സംസ്ഥാനത്ത് അന്തരീക്ഷ താപനില ക്രമാതീതമായി ഉയർന്നതോടെ ജനവാസ മേഖലകളിലും വീടുകളിലും പാമ്പുകളുടെ സാന്നിധ്യം വർധിക്കുന്നു. ചൂട് താങ്ങാനാവാതെ തണുപ്പുള്ള ഇടങ്ങൾ തേടിയാണ് പാമ്പുകൾ പ്രധാനമായും വീടുകൾക്കുള്ളിലേക്കും ശുചിമുറികളിലേക്കും എത്തുന്നത്.
പൊതുവേ തണുപ്പ് കൂടുതലുള്ള ക്ലോസറ്റുകൾ, വാഷ് ബേസിനുകൾക്ക് അടിവശം, കുളിമുറികൾ, സ്റ്റോർ റൂമുകൾ, തറയിൽ കൂട്ടിയിട്ടിരിക്കുന്ന തുണികൾക്കിട എന്നിവടങ്ങളിലാണ് പാമ്പുകൾ അഭയം കണ്ടെത്തുന്നത്. വാതിലുകൾക്കും ജനലുകൾക്കും അടിയിലെ വിടവുകളിലൂടെയും ഡ്രെയിനേജ് പൈപ്പുകൾ വഴിയുമാണ് ഇവ അകത്തേക്ക് കടക്കുന്നത്.
ശ്രദ്ധിക്കേണ്ട പ്രധാന കാര്യങ്ങൾ:
* ശുചിമുറികൾ ഉപയോഗിക്കുമ്പോൾ: ക്ലോസറ്റുകൾ ഉപയോഗിക്കുന്നതിന് മുൻപായി ഫ്ലഷ് ചെയ്യുകയോ ലൈറ്റിട്ട് കൃത്യമായി പരിശോധിക്കുകയോ ചെയ്യുക.
* പരിസര ശുചിത്വം: വീട്ടുപറമ്പിൽ കൂട്ടിയിട്ടിരിക്കുന്ന ചപ്പുചവറുകൾ, മരത്തടികൾ, പഴയ ടൈലുകൾ, കല്ലുകൾ എന്നിവ നീക്കം ചെയ്യുക. ഇവ പാമ്പുകൾക്ക് താവളമൊരുക്കും.
* സുരക്ഷ ഉറപ്പാക്കുക: വീടിന്റെ വാതിലുകൾക്കും ജനലുകൾക്കും അടിയിലെ വിടവുകൾ അടയ്ക്കുക. ഡ്രെയിനേജ് പൈപ്പുകളുടെ അറ്റത്ത് നെറ്റ് സ്ഥാപിക്കുക.
* പാദരക്ഷകൾ പരിശോധിക്കുക: പുറത്തു വെച്ചിരിക്കുന്ന ഷൂസ്, ഹെൽമെറ്റ് എന്നിവ ധരിക്കുന്നതിന് മുൻപ് പാമ്പോ മറ്റ് വിഷജീവികളോ ഇല്ലെന്ന് ഉറപ്പുവരുത്തുക.
* എലിശല്യം നിയന്ത്രിക്കുക: പാമ്പുകൾ ഇരതേടിയാണ് വീടുകളിലേക്ക് എത്തുന്നത് എന്നതിനാൽ വീടും പരിസരവും എലിമുക്തമാക്കുക.
പാമ്പുകളെ കണ്ടാൽ പരിഭ്രാന്തരായി അവയെ തല്ലിക്കൊല്ലാൻ ശ്രമിക്കരുതെന്നും വനംവകുപ്പിന്റെ സർപ്പ (SARPA) മൊബൈൽ ആപ്പ് വഴിയോ എമർജൻസി നമ്പറുകളിലോ വിളിച്ച് അംഗീകൃത സ്നേക്ക് റെസ്ക്യൂവർമാരുടെ സഹായം തേടണമെന്നും അധികൃതർ അറിയിച്ചു. പാമ്പുകടിയേറ്റാൽ സ്വയംചികിത്സയ്ക്ക് മുതിരാതെ ഉടൻതന്നെ ആന്റിവെനം സൗകര്യമുള്ള സർക്കാർ ആശുപത്രികളിൽ എത്തിക്കണം.
Post a Comment