പൊട്ടാസ്യം, ഫൈബർ, വിറ്റാമിൻ സി തുടങ്ങിയ പോഷകങ്ങളാല് സമ്പന്നമാണ് ഇത്. എന്നാല്, പഴം കഴിച്ച ഉടൻ തന്നെ വെള്ളം കുടിക്കുന്ന ശീലം നിങ്ങള്ക്കുണ്ടോ? അങ്ങനെ ചെയ്യുന്നത് ദഹനവ്യവസ്ഥയെയും മൊത്തത്തിലുള്ള ആരോഗ്യത്തെയും ദോഷകരമായി ബാധിച്ചേക്കാം എന്ന് ആരോഗ്യ വിദഗ്ദ്ധർ ചൂണ്ടിക്കാണിക്കുന്നു.
പഴത്തിന് ശേഷം വെള്ളം കുടിച്ചാല് ഉണ്ടാകുന്ന ആരോഗ്യ പ്രശ്നങ്ങള്
വയറ്റില് ഭക്ഷണം ദഹിപ്പിക്കാൻ സഹായിക്കുന്ന എൻസൈമുകളും അമ്ലങ്ങളും (Gastric Acids) അടങ്ങിയിട്ടുണ്ട്. പഴം കഴിച്ച ഉടൻ വെള്ളം കുടിക്കുമ്പോള്, പ്രത്യേകിച്ച് തണുത്ത വെള്ളം കുടിക്കുമ്പോള്, ഈ ദഹനരസങ്ങള് നേർത്തുപോകുകയും ദഹനപ്രക്രിയ മന്ദഗതിയിലാവുകയും ചെയ്യുന്നു. പഴത്തില് ധാരാളം ലയിക്കുന്ന നാരുകള് അടങ്ങിയിട്ടുണ്ട്. ഇവ വെള്ളവുമായി ചേർന്ന് വയറ്റില് വച്ച് പെട്ടെന്ന് വീർക്കുകയും അഴുകല് വേഗത്തിലാക്കുകയും ചെയ്യുന്നു. ഇത് മൂലം വയറ്റില് ഗ്യാസ് നിറയാനും വയറു വീർക്കാനും അസിഡിറ്റിക്കും സാധ്യതയേറുന്നു.
പഴം കഴിച്ചതിന് ശേഷം തണുത്ത വെള്ളം കുടിക്കുന്നത് ദഹനനാളത്തിലെ രക്തക്കുഴലുകളെ ചുരുക്കുകയും ആമാശയത്തിന് ഭക്ഷണം ദഹിപ്പിക്കാനുള്ള താപനില കുറയ്ക്കുകയും ചെയ്യുന്നു. ഇത് മലബന്ധത്തിനും ദഹനക്കേടിനും കാരണമാകാം. ദഹനം മന്ദഗതിയിലാകുന്നതും ആമാശയത്തില് നിന്ന് ഭക്ഷണം കുടലിലേക്ക് പോകുന്ന പ്രക്രിയ തടസ്സപ്പെടുന്നതും രക്തത്തിലെ ഗ്ലൂക്കോസ് നില ക്രമാതീതമായി ഉയരാൻ ഇടയാക്കും.
ശരിയായ രീതി എന്താണ്?
1.
പഴം കഴിച്ച ശേഷം കുറഞ്ഞത് 20 മുതല് 30 മിനിറ്റ് വരെ കഴിഞ്ഞു മാത്രം വെള്ളം കുടിക്കുക.
2.
അല്പം കഴിഞ്ഞ് വെള്ളം കുടിക്കുകയാണെങ്കില് പോലും തണുത്ത വെള്ളത്തിന് പകരം ചെറുചൂടുവെള്ളമോ സാധാരണ താപനിലയിലുള്ള വെള്ളമോ ഉപയോഗിക്കുക.
3.
ആരോഗ്യത്തിന് ഏറെ ഗുണകരമായ പഴങ്ങള് കഴിക്കുമ്പോള്, ശേഷം വെള്ളം കുടിക്കുന്നതില് ഈ ചെറിയ മുൻകരുതല് എടുത്താല് ദഹനപ്രശ്നങ്ങളില്ലാതെ പൂർണ്ണ പോഷകം ശരീരത്തിന് ലഭ്യമാക്കാം.
ദഹനം മെച്ചപ്പെടുത്താൻ പാലിക്കേണ്ട ശീലങ്ങള്
ഭക്ഷണം കഴിക്കുന്ന അളവിലും രീതിയിലും കാണിക്കുന്ന ശ്രദ്ധ പോലെ തന്നെ പ്രധാനമാണ് ഭക്ഷണത്തിന് ശേഷമുള്ള ശീലങ്ങളും. നാം കഴിക്കുന്ന ആഹാരം കൃത്യമായി ദഹിച്ച് പോഷകങ്ങള് ശരീരത്തിന് ലഭിക്കാനും ഗ്യാസ്, അസിഡിറ്റി, വയറു വീർക്കല് എന്നിവ ഒഴിവാക്കാനും ഭക്ഷണശേഷം ചില കാര്യങ്ങള് ശ്രദ്ധിക്കേണ്ടതുണ്ട്.
ഭക്ഷണത്തിന് ശേഷം 10 മുതല് 15 മിനിറ്റ് വരെ പതിയെ നടക്കുന്നത് ദഹനവ്യവസ്ഥയെ ഉത്തേജിപ്പിക്കുകയും ഭക്ഷണം ആമാശയത്തില് നിന്ന് കുടലിലേക്ക് പോകുന്ന പ്രക്രിയ വേഗത്തിലാക്കുകയും ചെയ്യുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയാനും സഹായിക്കും. ഭക്ഷണശേഷം കുറഞ്ഞത് 30 മിനിറ്റെങ്കിലും നിവർന്ന് ഇരിക്കാൻ ശ്രദ്ധിക്കുക. കുനിഞ്ഞിരിക്കുകയോ ഉടൻ തന്നെ കിടക്കുകയോ ചെയ്താല് ആമാശയത്തിലെ ആസിഡ് തിരികെ തൊണ്ടയിലേക്ക് വരാനും നെഞ്ചെരിച്ചില് ഉണ്ടാകാനും സാധ്യതയുണ്ട്.
Post a Comment