റദ്ദാക്കലുകളും സമയമാറ്റവും
* എമിറേറ്റ്സ്: ദുബായ്-ബഹ്റൈൻ റൂട്ടിലെ രണ്ട് വിമാനങ്ങൾ (EK835, EK837) റദ്ദാക്കി. പ്രതിസന്ധിയുടെ പശ്ചാത്തലത്തിൽ യാത്രക്കാർക്ക് ടിക്കറ്റ് നിരക്കിൽ പിഴയില്ലാതെ യാത്ര തീയതി മാറ്റാനുള്ള സൗകര്യം അനുവദിച്ചിട്ടുണ്ട്.
* ഇത്തിഹാദ് എയർവേയ്സ്: അബുദാബിയിൽ നിന്ന് ബഹ്റൈനിലേക്കുള്ള നിരവധി സർവീസുകൾ ഓഗസ്റ്റ് 21 വരെ റദ്ദാക്കി. കുവൈറ്റിലേക്കുള്ള ചില സർവീസുകളും പുനഃക്രമീകരിച്ചു.
* എയർ അറേബ്യ: ഷാർജ, അബുദാബി എന്നിവിടങ്ങളിൽ നിന്ന് കുവൈറ്റ്, ബഹ്റൈൻ എന്നിവിടങ്ങളിലേക്കുള്ള സർവീസുകൾ റദ്ദാക്കി.
* ഫ്ലൈദുബായ്: സർവീസുകൾ നിലവിൽ ഷെഡ്യൂൾ പ്രകാരം നടക്കുന്നുണ്ടെങ്കിലും ദുബായിൽ നിന്ന് പുറപ്പെടുന്ന യാത്രക്കാർ 4 മണിക്കൂർ മുമ്പെങ്കിലും വിമാനത്താവളത്തിൽ എത്തണമെന്ന് നിർദ്ദേശിച്ചു.
ഇന്ത്യൻ യാത്രക്കാർക്ക് ജാഗ്രതാ നിർദേശം
ഇന്ത്യയിലെ പ്രധാന വിമാനത്താവളങ്ങളായ കൊച്ചി, തിരുവനന്തപുരം, ഡൽഹി, മുംബൈ, ബെംഗളൂരു എന്നിവിടങ്ങളിൽ സുരക്ഷ കർശനമാക്കിയതിനാൽ യാത്രക്കാർ ചെക്ക്-ഇൻ, സുരക്ഷാ പരിശോധനകൾക്കായി കൂടുതൽ സമയം നീക്കിവെക്കണമെന്ന് അറിയിപ്പുണ്ട്. കൂടാതെ സൗദി അറേബ്യയിലേക്ക് യാത്ര ചെയ്യുന്നവർ ട്രാൻസിറ്റ്, പ്രവേശന രേഖകൾ കൃത്യമാണെന്ന് മുൻകൂട്ടി ഉറപ്പാക്കണം.
അന്താരാഷ്ട്ര വിമാനക്കമ്പനികളും പ്രതിസന്ധിയിൽ
ബ്രിട്ടീഷ് എയർവേയ്സ്, ലുഫ്താൻസ, കെഎൽഎം, എയർ കാനഡ, സിംഗപ്പൂർ എയർലൈൻസ് തുടങ്ങിയ പ്രമുഖ അന്താരാഷ്ട്ര കമ്പനികൾ യുഎഇ ഉൾപ്പെടെയുള്ള പശ്ചിമേഷ്യൻ നഗരങ്ങളിലേക്കുള്ള സർവീസുകൾ താൽക്കാലികമായി റദ്ദാക്കുകയോ വ്യോമപാത മാറ്റുകയോ ചെയ്തിട്ടുണ്ട്.
ഹോർമുസ് കടലിടുക്കിലെ അനിശ്ചിതാവസ്ഥയും യുഎഇ മേഖലയ്ക്ക് നേരെയുണ്ടായ മിസൈൽ ഭീഷണിയുമാണ് വ്യോമയാന മേഖലയെ ബാധിച്ചത്. സാഹചര്യങ്ങൾ വേഗത്തിൽ മാറിക്കൊണ്ടിരിക്കുന്നതിനാൽ, വിമാനത്താവളത്തിലേക്ക് തിരിക്കുന്നതിന് മുൻപ് അതത് എയർലൈനുകളുടെ ഔദ്യോഗിക വെബ്സൈറ്റ് വഴിയോ ആപ്പ് വഴിയോ ഫ്ലൈറ്റ് സ്റ്റാറ്റസ് നേരിട്ട് പരിശോധിച്ച് ഉറപ്പുവരുത്തണമെന്ന് അധികൃതർ യാത്രക്കാരോട് അഭ്യർത്ഥിച്ചു.
Post a Comment