മഴക്കാലം കനത്തതോടെ ജനവാസ മേഖലകളില് പാമ്പുകളുടെ സാന്നിധ്യം വർധിക്കുന്നതായി റിപ്പോർട്ട്. കാറ്റും മഴയും മൂലം മാളങ്ങളില് വെള്ളം കയറുമ്പോള് സുരക്ഷിതമായ ഒളിത്താവളങ്ങള് തേടിയാണ് പാമ്പുകള് വീട്ടുപരിസരങ്ങളിലേക്ക് എത്തുന്നത്.
എന്നാല്, വീടും പരിസരവും കൃത്യമായി സൂക്ഷിച്ചില്ലെങ്കില് ചില പ്രത്യേക ഗന്ധങ്ങള് പാമ്പുകളെ വീടിനുള്ളിലേക്ക് വരെ ആകർഷിക്കാൻ കാരണമാകുമെന്നാണ് വിദഗ്ധർ നല്കുന്ന മുന്നറിയിപ്പ്.
പാമ്പുകള് ജനവാസ കേന്ദ്രങ്ങളിലേക്ക് ആകർഷിക്കപ്പെടാനുള്ള 5 പ്രധാന കാരണങ്ങള് താഴെ പറയുന്നവയാണ്:
എലികളുടെ സാന്നിധ്യം: പാമ്പുകളുടെ പ്രധാന ഇരകളായ എലികള് മഴ കനക്കുമ്പോള് മാളങ്ങള് ഉപേക്ഷിച്ച് വീടുകളില് അഭയം തേടാറുണ്ട്. എലികളുടെ മൂത്രം, വിസർജ്ജ്യം എന്നിവയുടെ ഗന്ധം വളരെ ദൂരെ നിന്ന് തന്നെ തിരിച്ചറിയാൻ പാമ്പുകള്ക്ക് കഴിയും. ഇത് പാമ്പുകളെ എളുപ്പത്തില് വീട്ടുപരിസരത്തേക്ക് എത്തിക്കുന്നു.
പക്ഷിക്കൂടുകളും കാഷ്ഠവും: ചിലയിനം പാമ്പുകള് പക്ഷികളെയും അവയുടെ മുട്ടകളെയും ആഹാരമാക്കുന്നവയാണ്. വീടിന്റെ ഓടുകളിലോ പരിസരത്തെ മരങ്ങളിലോ പക്ഷികള് കൂടു കൂട്ടുമ്പോള് ഉണ്ടാകുന്ന ഗന്ധം പാമ്പുകളെ ആകർഷിക്കാറുണ്ട്.
തവളകളും മീനുകളും: മഴക്കാലത്ത് വീട്ടുപറമ്പുകളില് വെള്ളം കെട്ടിക്കിടക്കുന്നതും ഓടകള് അടയുന്നതും തവളകളുടെയും ചെറിയ മീനുകളുടെയും സാന്നിധ്യം വർധിപ്പിക്കും. ഇവയുടെ ഗന്ധം പിന്തുടർന്ന് പാമ്പുകള് എത്താനുള്ള സാധ്യതയേറെയാണ്.
മറ്റ് പാമ്പുകളുടെ സാന്നിധ്യം (ഫെറോമോണുകള്): ഇണകളെ ആകർഷിക്കാനും സഞ്ചാരപാത കണ്ടെത്താനും പാമ്പുകള് 'ഫെറോമോണുകള്' എന്ന രാസവസ്തു പുറപ്പെടുവിക്കാറുണ്ട്. മഴക്കാലം പല പാമ്പുകളുടെയും പ്രജനന കാലമായതിനാല്, മുൻപ് ഏതെങ്കിലും പാമ്പ് കടന്നുപോയ വഴിയിലൂടെ അതിന്റെ ഗന്ധം പിന്തുടർന്ന് മറ്റ് പാമ്പുകള് എത്താൻ സാധ്യത കൂടുതലാണ്.
അശാസ്ത്രീയമായ ഒളിത്താവളങ്ങള്: വീടിനോട് ചേർന്ന് വളർന്നുനില്ക്കുന്ന പുല്ലുകള്, കരിയിലക്കൂട്ടങ്ങള്, വിറകുകളും തടികളും അടുക്കിവെച്ചിരിക്കുന്ന ഇടങ്ങള് എന്നിവ പാമ്പുകള്ക്ക് സുരക്ഷിതമായ ഒളിത്താവളമൊരുക്കുന്നു. ഇത്തരം സ്ഥലങ്ങളില് നിന്നുള്ള ഗന്ധവും പാമ്പുകളെ ആകർഷിക്കും.
പ്രതിരോധ മാർഗങ്ങള്
മനുഷ്യരെ കാണുമ്പോള് പാമ്പുകള് സാധാരണയായി ഒഴിഞ്ഞുമാറാനാണ് ശ്രമിക്കാറുള്ളതെങ്കിലും അശ്രദ്ധ അപകടങ്ങള്ക്ക് കാരണമായേക്കാം. വീടും പരിസരവും എപ്പോഴും വൃത്തിയായി സൂക്ഷിക്കുക, ഇരകളാകാൻ സാധ്യതയുള്ള എലികള്, തവളകള് എന്നിവയുടെ സാന്നിധ്യം ഒഴിവാക്കുക, വീടിന് ചുറ്റും വെള്ളം കെട്ടിക്കിടക്കാൻ അനുവദിക്കരുത് എന്നിവയാണ് പ്രധാന പ്രതിരോധ മാർഗങ്ങള്. കൂടാതെ, പാമ്പുകള്ക്ക് അകത്തേക്ക് പ്രവേശിക്കാൻ സാധിക്കുന്ന തരത്തിലുള്ള ചെറിയ വിടവുകളും പൊത്തുകളും അടച്ചുറപ്പുള്ളതാക്കണമെന്നും വിദഗ്ധർ നിർദേശിക്കുന്നു.
Post a Comment