പഴങ്ങളും പച്ചക്കറികളും വാങ്ങിയതിന് പിന്നാലെ നേരെ എടുത്ത് ഫ്രിഡ്ജില് വെക്കുന്നത് പൊതുവെ എല്ലായിടത്തുമുള്ളൊരു ശീലമാണ്.
കൂടുതല് ദിവസം കേടുകൂടാതെ ഇരിക്കാനും തണുപ്പോടെ കഴിക്കുക തുടങ്ങിയ ലക്ഷ്യങ്ങളാണ് ഈ ശീലത്തിന് പിന്നില്. എന്നാല്, എല്ലാ പഴങ്ങളും ഫ്രിഡ്ജില് വെക്കുന്നത് അവയുടെ ഗുണവും രുചിയും നിലനിർത്താൻ സഹായിക്കില്ലെന്നാണ് ആരോഗ്യ-ഭക്ഷണ വിദഗ്ധർ ചൂണ്ടിക്കാണിക്കുന്നത്. ചില പഴങ്ങള് തണുത്ത താപനിലയില് സൂക്ഷിക്കുമ്പോള് അവയുടെ സ്വാഭാവികമായ പാകമാകുന്ന പ്രക്രിയ തടസപ്പെടുകയും, രുചി നഷ്ടപ്പെടുകയും, കോശങ്ങളുടെ ഘടന നശിക്കുകയും ചെയ്യും.
മിക്ക ആളുകളും അബദ്ധത്തില് ഫ്രിഡ്ജില് വെക്കാറുള്ള, എന്നാല് ഒരിക്കലും ഫ്രിഡ്ജില് സൂക്ഷിക്കാൻ പാടില്ലാത്ത ഏഴ് പഴങ്ങള് ഏതൊക്കെയാണെന്ന് നോക്കാം:
1. തണ്ണിമത്തൻ
മുറിക്കാത്ത തണ്ണിമത്തൻ എപ്പോഴും മുറിയിലെ സാധാരണ താപനിലയില് സൂക്ഷിക്കുന്നതാണ് ഏറ്റവും ഉത്തമം. തണ്ണിമത്തൻ ഫ്രിഡ്ജില് വെക്കുമ്പോള് അതിലടങ്ങിയിരിക്കുന്ന ശക്തമായ ആൻ്റിഓക്സിഡന്റുകളായ ലൈകോപീൻ, ബീറ്റാ കരോട്ടിൻ എന്നിവയുടെ അളവ് ഗണ്യമായി കുറയുമെന്ന് പഠനങ്ങള് വ്യക്തമാക്കുന്നു. കൂടാതെ തണുത്ത അന്തരീക്ഷം ഇതിന്റെ സ്വാഭാവിക രുചിയെയും ബാധിക്കും. എന്നാല്, തണ്ണിമത്തൻ മുറിച്ച ശേഷമാണെങ്കില് അത് വായു കടക്കാത്ത പാത്രത്തിലാക്കി ഫ്രിഡ്ജില് സൂക്ഷിക്കാവുന്നതാണ്.
2. വാഴപ്പഴം
വാഴപ്പഴം ഫ്രിഡ്ജില് വെക്കാൻ പാടില്ലാത്ത പ്രധാന വിഭവങ്ങളിലൊന്നാണ്. തണുത്ത താപനില വാഴപ്പഴം പാകമാകുന്ന പ്രക്രിയയെ പൂർണമായും മന്ദഗതിയിലാക്കും. കൂടാതെ, ഫ്രിഡ്ജിലെ ഈർപ്പവും തണുപ്പും കാരണം വാഴപ്പഴത്തിന്റെ തൊലി പെട്ടെന്ന് കറുത്ത നിറമായി മാറുകയും അതിന്റെ ഉള്ളിലെ മൃദുത്വം നഷ്ടപ്പെട്ട് സ്വാഭാവിക രുചി ഇല്ലാതാവുകയും ചെയ്യും.
3. ആപ്പിള്
ആപ്പിള് വാങ്ങി ഉടനടി ഫ്രിഡ്ജില് വെക്കേണ്ട ആവശ്യമില്ല. സാധാരണ താപനിലയില് വെക്കുമ്പോള് ആപ്പിളിന്റെ പുറംതൊലിയിലെ ഘടനയും രുചിയും ആഴ്ചകളോളം അതേപടി നിലനില്ക്കും. എന്നാല് ആപ്പിള് ഫ്രിഡ്ജില് വെക്കുമ്പോള് അത് പെട്ടെന്ന് പഴുക്കാൻ സഹായിക്കുന്ന 'എഥിലീൻ' വാതകം പുറത്തുവിടുകയും, ഇത് ഫ്രിഡ്ജില് ഇരിക്കുന്ന മറ്റ് പച്ചക്കറികളും പഴങ്ങളും വേഗത്തില് ചീഞ്ഞുപോകാൻ കാരണമാകുകയും ചെയ്യും.
4. മാമ്പഴം
പച്ചമാങ്ങയോ പഴുത്ത മാമ്പഴമോ ഫ്രിഡ്ജില് വെക്കുന്നത് അവയുടെ സ്വാഭാവിക ഗുണത്തെ സാരമായി തന്നെ ബാധിക്കും. തണുത്ത അന്തരീക്ഷം മാമ്പഴം പാകമാകുന്നതിനെ തടസപ്പെടുത്തുകയും അതിന്റെ മധുരവും സുഗന്ധവും കുറയ്ക്കുകയും ചെയ്യും. മാമ്പഴം എപ്പോഴും പുറത്തു വെച്ച് സ്വാഭാവികമായ രീതിയില് പഴുക്കാൻ അനുവദിക്കുന്നതാണ് അതിന്റെ യഥാർഥ രുചി ലഭിക്കാൻ ഏറ്റവും നല്ലത്.
5. പപ്പായ
മാമ്പഴത്തെപ്പോലെ തന്നെ പപ്പായയും ഫ്രിഡ്ജില് വെക്കുമ്പോള് അതിന്റെ സ്വാഭാവികമായ പാകമാകല് പ്രക്രിയ തടസപ്പെടുന്നു. തണുപ്പ് തട്ടുന്നതോടെ പപ്പായയുടെ ഉള്ഭാഗം പരുക്കനാകാനും രുചി വ്യത്യാസപ്പെടാനും സാധ്യതയുണ്ട്. പുറത്തുവെച്ച് നന്നായി പഴുത്ത ശേഷം മാത്രം ആവശ്യമെങ്കില് കുറച്ചു സമയത്തേക്ക് തണുപ്പിക്കാൻ വെക്കാവുന്നതാണ്.
6. ചെറുനാരങ്ങയും ഓറഞ്ചും
നാരങ്ങ, ഓറഞ്ച്, മധുരനാരങ്ങ തുടങ്ങിയ സിട്രസ് പഴങ്ങള് ഫ്രിഡ്ജിലെ കടുത്ത തണുപ്പില് വെക്കുമ്പോള് അവയുടെ തൊലിയിലെ ഈർപ്പം നഷ്ടപ്പെട്ട് വരണ്ടുപോവുകയും കടും നിറമായി മാറുകയും ചെയ്യും. ഇത് പഴത്തിന്റെ ഉള്ളിലെ നീരിന്റെ അളവ് കുറയ്ക്കാനും കയ്പ്പ് രുചി ഉണ്ടാകാനും കാരണമാകും. ഇവ എപ്പോഴും വായുസഞ്ചാരമുള്ള പാത്രങ്ങളില് സാധാരണ താപനിലയില് സൂക്ഷിക്കുന്നതാണ് നല്ലത്
7. അവോക്കാഡോ
വിപണിയില് നിന്നും വാങ്ങുന്ന അവോക്കാഡോകള് പലപ്പോഴും പൂർണമായി പഴുത്തവയായിരിക്കില്ല. ഇവ ഫ്രിഡ്ജില് വെച്ചാല് അവ പിന്നീട് ഒരിക്കലും ശരിയായ രീതിയില് പഴുക്കുകയില്ല. അവോക്കാഡോയുടെ പരുക്കൻ ഘടന മാറി വെണ്ണപോലെ മൃദുവാകണമെങ്കില് അത് സാധാരണ താപനിലയില് തന്നെ വെക്കണം. നന്നായി പഴുത്തതിന് ശേഷം മാത്രം കേടുവരാതിരിക്കാൻ ഫ്രിഡ്ജിലേക്ക് മാറ്റാം.
Post a Comment