കണ്ണൂര്‍: കെ.എസ്.ആര്‍.ടി.സി കണ്ണൂര്‍ യൂനിറ്റിലെ ബജറ്റ് ടൂറിസം സെല്ലിന്റെ നേതൃത്വത്തില്‍ കണ്ണൂരില്‍ നിന്നും മൂന്നാറിലേക്ക് ഉല്ലാസയാത്ര സംഘടിപ്പിക്കുന്നു.
ഫെബ്രുവരി 27 മുതല്‍ കണ്ണൂര്‍ ഡിപ്പോയില്‍നിന്ന് യാത്ര തുടങ്ങുന്നതോടെ മലബാര്‍ മേഖലയില്‍ നിന്നും ഇടുക്കി ഹൈറേഞ്ചിലേക്ക് കുറഞ്ഞ ചെലവില്‍ ഉല്ലാസയാത്ര സാധ്യമാകും.
മൂന്നാറിലെ തേയില ഫാക്ടറി, ടീ മ്യൂസിയം, ടോപ് സ്റ്റേഷന്‍, കുണ്ടള തടാകം, ഇക്കോ പോയന്റ്, മാട്ടുപ്പെട്ടി അണക്കെട്ട്, ഫ്ലവര്‍ ഗാര്‍ഡന്‍ എന്നിവയാണ് യാത്രയില്‍ കാണാനാവുക. കെ.എസ്.ആര്‍.ടി.സിയുടെ ടിക്കറ്റിതര വരുമാനം വര്‍ധിപ്പിക്കുന്നതിന്റെ ഭാഗമായാണ് യാത്ര സംഘടിപ്പിക്കുന്നത്. മൂന്നാറില്‍ എ.സി സ്ലീപ്പര്‍ ബസില്‍ താമസവും കാഴ്ചകള്‍ കാണുന്നതും ഉള്‍പ്പെടെ 1850 രൂപയാണ് ടിക്കറ്റ് നിരക്ക്. ഭക്ഷണ ചെലവും എന്‍ട്രി ഫീസും യാത്രക്കാര്‍ വഹിക്കണം.
ഇത് ഉപയോഗപ്പെടുത്തിയാല്‍ ചെറുസംഘമായി യാത്ര ചെയ്യുന്നവര്‍ക്ക് കുറഞ്ഞ ചെലവില്‍ മൂന്നാര്‍ കണ്ട് മടങ്ങാം. അന്വേഷണങ്ങള്‍ക്കും ബുക്കിങ്ങിനും രാവിലെ ഒമ്ബതുമുതല്‍ വൈകീട്ട് ആറുമണി വരെ 9496131288, 8089463675 എന്നീ നമ്ബറുകളില്‍ ബന്ധപ്പെടാം. മറ്റു സമയങ്ങളില്‍ വാട്സ്‌ആപ് വഴിയും ബുക്ക് ചെയ്യാം.
Post a Comment