കണ്ണൂർ: ഗതാഗത നിയമലംഘനത്തിന് പിഴയടയ്ക്കാനുണ്ടെന്ന് കാണിച്ച് വാട്സാപ്പ് വഴി വ്യാജ സന്ദേശങ്ങളും ലിങ്കുകളും അയച്ച് പണം തട്ടുന്ന സംഘങ്ങൾ സജീവമാകുന്നതായി സൈബർ സെൽ മുന്നറിയിപ്പ് നൽകി.
ട്രാഫിക് നിയമലംഘനം നടത്തിയെന്നും ഉടൻ പിഴ അടച്ചില്ലെങ്കിൽ വാഹനം പിടിച്ചെടുക്കുകയോ കോടതി നടപടികൾ നേരിടേണ്ടി വരികയോ ചെയ്യുമെന്നുമുള്ള ഭീഷണി സന്ദേശങ്ങളാണ് സാധാരണക്കാരെ ലക്ഷ്യമിട്ട് വാട്സാപ്പിൽ എത്തുന്നത്. സന്ദേശത്തോടൊപ്പം നൽകിയിരിക്കുന്ന വ്യാജ ലിങ്കുകളിൽ ക്ലിക്ക് ചെയ്ത് പണം അടയ്ക്കാൻ ശ്രമിക്കുമ്പോഴാണ് ബാങ്ക് അക്കൗണ്ടുകളിൽ നിന്ന് പണം ചോരുന്നത്. ചില സന്ദേശങ്ങളിലെ ലിങ്കുകൾ ഫോണിലേക്ക് അനുമതിയില്ലാതെ മാൽവെയറുകളോ വ്യാജ എപികെ (APK) ഫയലുകളോ ഡൗൺലോഡ് ചെയ്യിച്ച് വ്യക്തിഗത, ബാങ്കിങ് വിവരങ്ങൾ തട്ടിയെടുക്കുന്നതായും കണ്ടെത്തിയിട്ടുണ്ട്.
മോട്ടോർ വാഹന വകുപ്പോ കേരള പോലീസോ വാട്സാപ്പ് വഴി പിഴയടയ്ക്കാനുള്ള ലിങ്കുകൾ അയക്കാറില്ലെന്ന് അധികൃതർ വ്യക്തമാക്കി. വാഹന ഉടമകൾക്ക് എന്തെങ്കിലും തരത്തിലുള്ള ട്രാഫിക് പിഴകൾ നിലവിലുണ്ടോ എന്ന് പരിശോധിക്കാൻ കേന്ദ്ര ഉപരിതല ഗതാഗത മന്ത്രാലയത്തിന്റെ ഔദ്യോഗിക പോർട്ടലായ 'echallan.parivahan.gov.in' അല്ലെങ്കിൽ 'mParivahan' മൊബൈൽ ആപ്പ് മാത്രമേ ഉപയോഗിക്കാവൂ.
അപരിചിതമായ നമ്പറുകളിൽ നിന്ന് വരുന്ന ഇത്തരം സന്ദേശങ്ങളിലെ ലിങ്കുകളിൽ ക്ലിക്ക് ചെയ്യുകയോ ബാങ്ക് വിവരങ്ങൾ നൽകുകയോ ചെയ്യരുത്. ഓൺലൈൻ തട്ടിപ്പിനിരയായാൽ കാലതാമസമില്ലാതെ 1930 എന്ന സൈബർ ഹെൽപ്പ്‌ലൈൻ നമ്പറിലോ 'cybercrime.gov.in' എന്ന പോർട്ടൽ വഴിയോ വിവരം അറിയിക്കണമെന്ന് പോലീസ് അറിയിച്ചു
.
Post a Comment