ബൈക്കപകടമെന്ന് കരുതി, പരിശോധിച്ചപ്പോള്‍ മുഖത്ത് വെടിയേറ്റ പാട്; കാസര്‍കോട് യുവാവിനെ വെടിയേറ്റു മരിച്ച നിലയില്‍ കണ്ടെത്തി

 


കാസർകോട്: (https://truevisionnews.com/) ബോവിക്കാനം കാട്ടിപ്പള്ളത്ത് യുവാവിനെ വെടിയേറ്റു മരിച്ച നിലയില്‍ കണ്ടെത്തി.

കാട്ടിപ്പള്ളത്തെ കെ. മൊയ്തീൻ കുഞ്ഞിയുടെ മകൻ ഹൈദർ അലി (27) ആണ് മരിച്ചത്. തിങ്കളാഴ്ച പുലർച്ചെ 12.10-ഓടെ വീടിന് ഏകദേശം 100 മീറ്റർ അകലെയുള്ള റോഡിലാണ് മൃതദേഹം കണ്ടെത്തിയത്.ബൈക്ക് മറിഞ്ഞുണ്ടായ അപകടത്തിലാണ് യുവാവ് മരിച്ചതെന്നാണ് നാട്ടുകാരും മറ്റും ആദ്യം കരുതിയിരുന്നത്. എന്നാല്‍ തുടർന്ന് നടത്തിയ പരിശോധനയില്‍ മുഖത്ത് കവിളിന് സമീപം വെടിയേറ്റ പാടും മൃതദേഹത്തിന് അരികില്‍ നിന്ന് ഒരു തോക്കും കണ്ടെത്തുകയായിരുന്നു.തോക്കുമായി ബൈക്കില്‍ സഞ്ചരിക്കുന്നതിനിടെ അബദ്ധത്തില്‍ വെടി പൊട്ടിയതാകാമെന്നാണ് പൊലീസിന്റെ പ്രാഥമിക നിഗമനം.

സ്വന്തം കൈവശമുണ്ടായിരുന്ന തോക്കില്‍ നിന്നാണ് വെടിയേറ്റതെന്നാണ് പൊലീസ് സംശയിക്കുന്നത്. സംഭവത്തില്‍ വിശദമായ അന്വേഷണം ആരംഭിച്ചിട്ടുണ്ട്.വിവരമറിഞ്ഞ് കാസർകോട് ജില്ലാ പൊലീസ് മേധാവി പി. നിധിൻ രാജ്, ബേക്കല്‍ ഡിവൈഎസ്പി കെ. വിനോദ് കുമാർ എന്നിവരുടെ നേതൃത്വത്തിലുള്ള ഉന്നത പൊലീസ് സംഘം സ്ഥലത്തെത്തി പരിശോധന നടത്തി.

കാസർകോട് ഗവ. ജനറല്‍ ആശുപത്രിയില്‍ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടം നടപടികള്‍ക്ക് ശേഷം ബന്ധുക്കള്‍ക്ക് വിട്ടുനല്‍കും.

Post a Comment

Previous Post Next Post