ഡല്ഹി: സാങ്കേതിക തടസങ്ങളെത്തുടർന്നുണ്ടായ അനിശ്ചിതത്വങ്ങള്ക്കൊടുവില്, സിബിഎസ്ഇ പന്ത്രണ്ടാം ക്ലാസ് പരീക്ഷയുടെ മാർക്ക് വെരിഫിക്കേഷനും ഉത്തരക്കടലാസുകളുടെ പുനർമൂല്യനിർണയത്തിനുമുള്ള ഓണ്ലൈൻ പോർട്ടല് ചൊവ്വാഴ്ച രാവിലെ പ്രവർത്തനസജ്ജമായി.അപേക്ഷകള് സമർപ്പിക്കേണ്ട ഘട്ടങ്ങള് വിശദീകരിക്കുന്ന വീഡിയോ ട്യൂട്ടോറിയലും സിബിഎസ്ഇ ബോർഡ് ഇതോടൊപ്പം പുറത്തുവിട്ടിട്ടുണ്ട്. വിദ്യാർത്ഥികള്ക്ക് postresult.cbseit.in/pvr/ എന്ന ഔദ്യോഗിക പോർട്ടല് വഴി അപേക്ഷകള് സമർപ്പിക്കാം.
ഉത്തരക്കടലാസുകളുടെ സ്കാൻ ചെയ്ത പകർപ്പുകളിലെ പ്രശ്നങ്ങള് പരിശോധിക്കുന്നതിനും പുനർമൂല്യനിർണയത്തിനുമുള്ള പോർട്ടല് ഇന്ന് (ജൂണ് 2) മുതല് ജൂണ് 6 (ശനിയാഴ്ച അർദ്ധരാത്രി) വരെ തുറന്നിരിക്കും. പരീക്ഷാ ഫലത്തിന് ശേഷമുള്ള സേവനങ്ങള്ക്കായുള്ള പോർട്ടല് വഴി അപേക്ഷിക്കാനുള്ള സൗകര്യം ലഭ്യമാണെന്ന് സിബിഎസ്ഇ എക്സ് ഹാൻഡിലിലൂടെ അറിയിച്ചു. അപേക്ഷ നടപടികളിലേക്ക് കടക്കുന്നതിന് മുൻപ് വിദ്യാർത്ഥികള് നിർദ്ദേശ വീഡിയോ നിർബന്ധമായും കാണണമെന്ന് ബോർഡ് അഭ്യർത്ഥിച്ചിട്ടുണ്ട്.
എങ്ങനെ അപേക്ഷിക്കാം?
സിബിഎസ്ഇയുടെ ഔദ്യോഗിക പോർട്ടലായ postresult.cbseit.in/pvr/ സന്ദർശിച്ച് നിങ്ങളുടെ അക്കൗണ്ടില് ലോഗിൻ ചെയ്യുക.
ലോഗിൻ ചെയ്ത ശേഷം, നിങ്ങള് അപേക്ഷിക്കാൻ ആഗ്രഹിക്കുന്ന സേവനം തിരഞ്ഞെടുക്കുക.
നിങ്ങളുടെ ഔദ്യോഗിക തിരിച്ചറിയല് രേഖകള് നല്കി പോർട്ടലിലേക്ക് പ്രവേശിക്കുക.
സിബിഎസ്ഇ പോസ്റ്റ്-റിസള്ട്ട് സർവീസ് പോർട്ടലില് ലോഗിൻ ചെയ്ത ശേഷം, പ്രസക്തമായ വിഷയം തിരഞ്ഞെടുത്ത്, ചോദ്യങ്ങള് കൃത്യമായി അടയാളപ്പെടുത്തി വേണം ഓണ്ലൈനായി ഫീസ് അടയ്ക്കേണ്ടത്. കൃത്യമായ കാരണങ്ങളില്ലാത്തതോ നിശ്ചിത സമയപരിധിക്ക് ശേഷമുള്ളതോ ആയ അപേക്ഷകള് പരിഗണിക്കുന്നതല്ല. ഓഫ്ലൈൻ അപേക്ഷകള് സ്വീകരിക്കില്ല.
ഉത്തരക്കടലാസുകളുടെ മാർക്ക് പരിശോധനയ്ക്കും പുനർമൂല്യനിർണ്ണയത്തിനുമുള്ള ഫീസ് വിവരങ്ങള്
മാർക്ക് വെരിഫിക്കേഷൻ: ഒരു ഉത്തരക്കടലാസിന് 500 രൂപ
സ്കാൻ ചെയ്ത പകർപ്പുകളുടെ പരിശോധന: ഒരു ഉത്തരക്കടലാസിന് 100 രൂപ
പുനർമൂല്യനിർണ്ണയം: ഒരു ചോദ്യത്തിന് 100 രൂപ
യുപിഐ, ക്രെഡിറ്റ് കാർഡ്, ഡെബിറ്റ് കാർഡ് അല്ലെങ്കില് നെറ്റ് ബാങ്കിങ് എന്നിവ വഴി ഓണ്ലൈനായി ഫീസ് അടയ്ക്കാവുന്നതാണ്. സിബിഎസ്ഇയുടെ പുതിയ നിർദേശപ്രകാരം, ഉത്തരക്കടലാസുകളുടെ ഫോട്ടോക്കോപ്പി (സ്കാൻ ചെയ്ത പകർപ്പ്) ഇതിനകം കൈപ്പറ്റിയിട്ടുള്ള വിദ്യാർത്ഥികള്ക്ക് മാത്രമേ മാർക്ക് വെരിഫിക്കേഷനും പുനർമൂല്യനിർണയത്തിനും അപേക്ഷിക്കാൻ അർഹതയുണ്ടായിരിക്കുകയുള്ളൂ.
അപേക്ഷ സമർപ്പിക്കുന്നതിന് മുൻപ്, വിദ്യാർത്ഥികള് തങ്ങളുടെ ഉത്തരങ്ങള് ബോർഡിന്റെ ഔദ്യോഗിക മാർക്കിങ് സ്കീമുമായി ഒത്തുനോക്കി മൂല്യനിർണയത്തിലെ അപാകതകള് കൃത്യമായി കണ്ടെത്തേണ്ടതുണ്ട്. സ്കാൻ ചെയ്ത പകർപ്പ് പരിശോധിച്ച ശേഷം വിദ്യാർത്ഥി വ്യക്തമായി ചൂണ്ടിക്കാണിക്കുന്ന ചോദ്യങ്ങള്ക്ക് മാത്രമേ പുനർമൂല്യനിർണയം അനുവദിക്കൂ.
സിസ്റ്റം സുരക്ഷ ശക്തമാക്കുന്നതിനും വിദ്യാർത്ഥികള്ക്ക് സുഗമമായ അനുഭവം ഉറപ്പാക്കുന്നതിനുമായി സിബിഎസ്ഇ നേരത്തെ ഈ പ്രക്രിയ മാറ്റിവെച്ചിരുന്നു. ഇതാണ് പോർട്ടല് ആരംഭിക്കുന്നതില് നേരിയ താമസം വരാൻ കാരണം. പോർട്ടല് ലൈവ് ആയതോടെ, ഫലത്തില് അതൃപ്തിയുള്ള വിദ്യാർത്ഥികള്ക്ക് നിശ്ചിത സമയത്തിനുള്ളില് ഔദ്യോഗികമായി പുനപരിശോധനയ്ക്ക് അപേക്ഷിക്കാം.
Post a Comment