തൃപ്പൂണിത്തുറ: മലയാള ചലച്ചിത്ര താരം ടിനി ടോമിന്റെ മകൻ ആദം തൃപ്പൂണിത്തുറയില് എക്സൈസ് പിടിയിലായി. കഞ്ചാവ് കൈവശം വെച്ചതിനാണ് എക്സൈസ് സംഘം ഇയാളെ കസ്റ്റഡിയിലെടുത്തത്.
തൃപ്പൂണിത്തുറ സ്റ്റാച്യൂ ജംഗ്ഷന് സമീപം നടത്തിയ പരിശോധനയ്ക്കിടെയാണ് ആദം പിടിയിലായതെന്നാണ് റിപ്പോർട്ട്.
എക്സൈസ് ഇൻസ്പെക്ടർക്കും സംഘത്തിനും ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. ആദത്തിന്റെ പക്കല് നിന്ന് ചെറിയ അളവില് കഞ്ചാവ് കണ്ടെടുത്തതായാണ് വിവരം. ലഹരിമരുന്നിനെതിരെ ശക്തമായ നിലപാട് സ്വീകരിക്കുന്ന വ്യക്തിത്വമാണ് നടൻ ടിനി ടോം. തന്റെ മകന് ലഹരി മാഫിയയുടെ ഭീഷണി ഉണ്ടെന്നും സിനിമയിലെ ലഹരി ഉപയോഗത്തെക്കുറിച്ചും അദ്ദേഹം നേരത്തെ പരസ്യമായി പ്രതികരിച്ചിരുന്നു. ഈ സാഹചര്യത്തില് മകൻ തന്നെ ലഹരി കേസില് പിടിയിലായത് സിനിമാ ലോകത്തെയും ആരാധകരെയും ഞെട്ടിച്ചിട്ടുണ്ട്.പിടികൂടിയ ആദത്തെ എക്സൈസ് ഓഫീസിലെത്തിച്ച് ചോദ്യം ചെയ്തു വരികയാണ്. പിടിച്ചെടുത്ത കഞ്ചാവിന്റെ അളവ് കുറവായതിനാല് സ്റ്റേഷൻ ജാമ്യത്തില് വിടാൻ സാധ്യതയുണ്ടെന്നും സൂചനയുണ്ട്. ലഹരിമരുന്നിന്റെ ഉറവിടത്തെക്കുറിച്ചും എക്സൈസ് അന്വേഷണം ആരംഭിച്ചിട്ടുണ്ട്.
മകന്റെ ലഹരി ഉപയോഗത്തെക്കുറിച്ച് ടിനി ടോം മുൻപ് നടത്തിയ ആശങ്കകള് ശരിവെക്കുന്ന രീതിയിലുള്ള വാർത്തകളാണ് ഇപ്പോള് പുറത്തുവരുന്നത്. വിഷയത്തില് താരത്തിന്റെ പ്രതികരണം ഇതുവരെ ലഭ്യമായിട്ടില്ല.
Post a Comment