സ്വര്‍ണം വാങ്ങാൻ പ്ലാനിട്ടവര്‍ക്ക് പണി പാളി; ഇന്നത്തെ വില കേട്ടാല്‍ കണ്ണുതള്ളും

സംസ്ഥാനത്ത് സ്വർണവിലയില്‍ റെക്കോർഡ് വർധനവ് രേഖപ്പെടുത്തിയിരിക്കുകയാണ്. കഴിഞ്ഞ ദിവസങ്ങളില്‍ തുടർച്ചയായി കുറഞ്ഞുനിന്നിരുന്ന വില ഒറ്റയടിക്ക് കുതിച്ചുയർന്നത് ഉപഭോക്താക്കളെ അക്ഷരാർത്ഥത്തില്‍ ഞെട്ടിച്ചിരിക്കുകയാണ്.

ഒരു പവൻ സ്വർണത്തിന് ഇന്ന് 2,320 രൂപയാണ് വർധിച്ചത്. ഇതോടെ കേരളത്തില്‍ ഒരു പവൻ സ്വർണത്തിന്റെ വില 1,20,800 രൂപ എന്ന നിരക്കിലെത്തി. ഗ്രാമിന് 295 രൂപയുടെ വർധനവോടെ ഒരു ഗ്രാം സ്വർണത്തിന് 15,100 രൂപയാണ് ഇന്നത്തെ വിപണി നിരക്ക്. ഇന്നലെ പവന് 1,18,480 രൂപയായിരുന്ന സ്ഥാനത്താണ് ഈ വൻ കുതിച്ചുചാട്ടം ഉണ്ടായിരിക്കുന്നത്.

വിവിധ കാരറ്റുകളിലുള്ള സ്വർണത്തിന്റെ വിലയിലും ആനുപാതികമായ മാറ്റം വന്നിട്ടുണ്ട്. 18 കാരറ്റ് സ്വർണം ഗ്രാമിന് 12,405 രൂപയായും പവന് 99,240 രൂപയായും ഉയർന്നു. സാധാരണക്കാർക്കിടയില്‍ പ്രചാരമുള്ള 14 കാരറ്റ് സ്വർണത്തിന് ഗ്രാമിന് 9,660 രൂപയും (പവന് ₹77,280), 9 കാരറ്റിന് ഗ്രാമിന് 6,225 രൂപയുമാണ് (പവന് ₹49,800) ഇന്നത്തെ നിരക്ക്.