സ്വര്‍ണ്ണവില കേരള ചരിത്രത്തിലെ ഏറ്റവും ഉയര്‍ന്ന നിരക്കില്‍ ; ഉച്ചക്കു ശേഷവും വില കൂടി

കൊച്ചി: സംസ്ഥാനത്ത് റെക്കോഡുകള്‍ തകർത്ത് കുതിക്കുകയാണ് സ്വർണ വില. ബുധനാഴ്ച രാവിലെ ഗ്രാമിന് 100 രൂപ കൂടി 13,165ലും പവൻ സ്വർണത്തിന്റെ വില 800 രൂപ വർധിച്ച്‌ 105,320 രൂപയിലെത്തിയിരുന്നു.ഉച്ചക്കു ശേഷം 22 കാരറ്റ്(916)സ്വർണം ഗ്രാമിന് 35 രൂപ കൂടി 13,200ലെത്തി. ഒരു പവൻ സ്വർണത്തിന് 280 രൂപ വർധിച്ച്‌ 1,05,600 രൂപയായി പുതിയ റെക്കോഡിടുകയും ചെയ്തു.

ഇറാനിലെയും വെനിസ്വേലയിലെയും അമേരിക്കൻ ഇടപെടലാണ് സ്വർണ വിലയെ സ്വാധീനിക്കുന്നത്. ഇറാനുമായി വ്യാപര ബന്ധം പുലർത്തുന്ന രാജ്യങ്ങള്‍ക്ക് യു.എസ് 25 ശതമാനം പുതിയ തീരുവ പ്രഖ്യാപിക്കുകയും ചെയ്തിരുന്നു. ഇതും സ്വർണവിലയുടെ കുതിപ്പിനെ സ്വാധീനിച്ചു. ആഗോളവിപണിയിലും സ്വർണവില കുതിക്കുകയാണ്.

കഴിഞ്ഞ ഡിസംബറിലാണ് സ്വർണ വില ഒരു ലക്ഷം രൂപ കടന്നത്. പിന്നീട് കുറഞ്ഞിരുന്നു. ജനുവരി ഒന്നിന് 99,040 രൂപയായിരുന്ന സ്വർണവില ജനുവരി അഞ്ചിന് ലക്ഷം കടന്ന് 1,00,780 രൂപയിലെത്തി. ജനുവരി ഒമ്പതുമുതല്‍ സ്വർണവില കുതിക്കുകയാണ്. വില ഇനിയും വർധിക്കുമെന്നാണ് സൂചന.