മുബൈ: മുംബൈയില്‍ കനത്ത മഴയില്‍ മോണോറെയില്‍ ട്രെയിൻ തകരാറിലായി. ഇന്ന് വൈകീട്ടോടെ മുംബൈ മൈസൂര്‍ കോളനി സ്‌റ്റേഷന് സമീപത്താണ് സംഭവം.മുംബൈയില്‍ കനത്തമഴ തുടരുന്നതിനാലാണ് വൈദ്യുതിവിതരണം തകരാറിലായി ട്രെയിന്‍ നിശ്ചലമായതെന്ന് മുംബൈ മെട്രോപൊളിറ്റൻ റീജിയണ്‍ ഡെവലപ്‌മെന്റ് അതോറിറ്റി (എംഎംആർഡിഎ) വ്യക്തമാക്കി. 400ലധികം യാത്രക്കാരുമായി സഞ്ചരിച്ചിരുന്ന ട്രെയിനാണ് കനത്ത മഴയില്‍ തകരാറിലായത്.
ഉയരപ്പാതയിലൂടെ പോവുകയായിരുന്ന ട്രെയിനാണ് വൈദ്യുതിവിതരണം മുടങ്ങിയതോടെ ട്രാക്കില്‍ നിന്നുപോയത്. ഇതോടെ യാത്രക്കാര്‍ ഏറെനേരം ട്രെയിനുള്ളില്‍ കുടുങ്ങിക്കിടക്കുകയായിരുന്നു. അഗ്നിരക്ഷാസേനാംഗങ്ങള്‍ സ്ഥലത്തെത്തി ക്രെയിന്‍ ഉപയോഗിച്ച്‌ യാത്രക്കാരെ സുരക്ഷിതമായി പുറത്തേക്ക് ഇറക്കുന്നുണ്ട്. തിരക്ക് കാരണം ട്രെയിനിന്റെ ഒരു ഭാഗം ചരിഞ്ഞതായി മഹാരാഷ്ട്ര ഉപമുഖ്യമന്ത്രി ഏക്‌നാഥ് ഷിൻഡെ അറിയിച്ചു. ഹാർബർ ലൈൻ അടച്ചതിനാല്‍ നിരവധി യാത്രക്കാരെ മോണോറെയിലിലേക്ക് തിരിച്ചുവിട്ടു. അതാണ് തിരക്കിന് കാരണമെന്നും ഏക്‌നാഥ് ഷിൻഡെ ദേശീയ മാധ്യമങ്ങളോട് പറഞ്ഞു.
Post a Comment