'തോക്ക്' കാട്ടി ഒരു ലക്ഷം കവര്‍ന്നു; ഓടിച്ചിട്ട് പിടിച്ച്‌ നാട്ടുകാര്‍

കണ്ണൂർ : കണ്ണൂരിലെ ധനകാര്യ സ്ഥാപനത്തില്‍ തോക്ക് കാണിച്ച്‌ കവര്‍ച്ച. ഇന്ന് വൈകിട്ട് നാലുമണിയോടെയാണ് സംഭവം.

കൂട്ടുപുഴ പേരട്ട ടൗണില്‍ പ്രവര്‍ത്തിക്കുന്ന ആശ്രയ ഫൈനാന്‍സില്‍ ആണ് യുവാവ് കവര്‍ച്ച നടത്തിയത്. ഒരു വനിതാ ജീവനക്കാരി മാത്രമുള്ളപ്പോള്‍ സ്ഥാപനത്തില്‍ കയറിയ യുവാവ് കൈയ്യിലെ തോക്ക് കാണിച്ച്‌ പണം കവരുകയായിരുന്നു.

എന്നാല്‍ ഇവിടെ നിന്നും ഓടി രക്ഷപ്പെടാന്‍ ശ്രമിച്ച പ്രതിയെ നാട്ടുകാര്‍ ഓടിച്ചിട്ട് പിടികൂടി. പേരട്ട സ്വദേശി അബ്ദുള്‍ ഷുക്കൂറിനെ പിന്നീട് പോലീസിന് കൈമാറി. ഇയാളുടെ പക്കലുണ്ടായിരുന്നത് കളിത്തോക്കാണെന്ന് പിന്നീട് പൊലീസ് പരിശോധനയില്‍ വ്യക്തമായി.