തിരുവനന്തപുരം : സംസ്ഥാന വിദ്യാഭ്യാസ പരിശീലന സമിതിയുടെ (എസ്.സി.ഇ.ആര്.ടി) ആഭിമുഖ്യത്തില് ഹയര് സെക്കന്ഡറി വിദ്യാര്ഥികള്ക്കായി ചോദ്യശേഖരം (Question Pool) തയാറായി.
ഹയര് സെക്കന്ഡറിയിലെ വിവിധ വിഷയങ്ങളിലുള്ള സാമ്ബിള് ചോദ്യങ്ങള് ലഭ്യമാകുന്ന വെബ് സൈറ്റ് (www.questionpool.scert.kerala.gov.in) പൊതുവിദ്യാഭ്യാസ മന്ത്രി വി. ശിവന്കുട്ടി ഉദ്ഘാടനം ചെയ്തു. ഫെബ്രുവരി എട്ടിനു സംസ്ഥാനമൊട്ടാകെ നടന്ന ഹയര് സെക്കന്ഡറി ക്ലസ്റ്റര്തല പരിശീലന ശില്പശാലയിലൂടെ തയാറാക്കിയ മാതൃകാചോദ്യങ്ങളാണ് പോര്ട്ടലില് ഇപ്പോള് ലഭ്യമാവുക. ഹയര് സെക്കന്ഡറിയിലെ മുഴുവന് അധ്യാപകരും പങ്കാളികളായ കൂട്ടായ പ്രവര്ത്തനത്തിലൂടെ രണ്ടായിരത്തിലധികം സാമ്ബിള് ചോദ്യങ്ങളാണ് തയാറായിട്ടുള്ളത്.
പ്ലസ് വണ്, പ്ലസ് ടു വിഭാഗങ്ങളില് ഓരോന്നിലും ആയിരത്തിലധികം ചോദ്യപേപ്പറുകള് വീതം ലഭ്യമാകും. അവ വിദ്യാര്ഥികള്ക്കും അധ്യാപകര്ക്കും രക്ഷിതാക്കള്ക്കും ഡൗണ്ലോഡ് ചെയ്യാന് സാധിക്കുന്നതാണ്. കോവിഡ് പശ്ചാത്തലവും കുട്ടികളില് ദൃശ്യമായ പഠന വിടവുകളും കണക്കിലെടുത്ത് ദേശീയ തലത്തിലും സംസ്ഥാന തലത്തിലും വരുത്തിയ ഉള്ളടക്ക ക്രമീകരണമുള്പ്പെടെയുള്ള മാറ്റങ്ങള് കൂടി പരിഗണിച്ചാണ് ഈ ചോദ്യപേപ്പറുകള് തയാറാക്കിയിട്ടുള്ളത്. ഭാഷാവിഷയങ്ങള് ഒഴികെയുള്ളവയുടെ മലയാളപരിഭാഷയും ലഭ്യമാക്കിയിട്ടുണ്ട്. വിദ്യാര്ഥികള്ക്ക് ചോദ്യങ്ങള് ഡൗണ്ലോഡ് ചെയ്യാന് ആവശ്യമായ സഹായങ്ങള് അധ്യാപകര് നല്കണമെന്ന് മന്ത്രി നിര്ദേശിച്ചു.
ചടങ്ങില് പൊതുവിദ്യാഭ്യാസ ഡയറക്ടര് കെ. ജീവന്ബാബു, എസ്.സി.ഇ.ആര്.ടി ഡയറക്ടര് ഡോ. ആര്.കെ. ജയപ്രകാശ്, ഹയര് സെക്കന്ഡറി ജോയിന്റ് ഡയറക്ടര് ആര്. സുരേഷ്കുമാര്, എസ്.സി.ഇ.ആര്.ടി. റിസര്ച്ച് ഓഫിസര് രഞ്ജിത് സുഭാഷ് എന്നിവര് പങ്കെടുത്തു.
Post a Comment