തിരുവനന്തപുരം: മോട്ടോർ വാഹന നികുതി കുടിശിക ഇളവുകളോടെ ഒടുക്കി ബാധ്യതയില്‍ നിന്നും, നിയമ നടപടികളില്‍ നിന്നും ഒഴിവാകാനുള്ള ഒറ്റത്തവണ നികുതി കുടിശിക തീർപ്പാക്കല്‍ പദ്ധതിയുടെ കാലാവധി മാർച്ച്‌ 31 ന് അവസാനിക്കും.
2020 മാർച്ച്‌ 31 വരെ നികുതി ഒടുക്കിയതിന് ശേഷം നികുതി ഒടുക്കുവാൻ കഴിയാത്ത വാഹന ഉടമകള്‍ക്ക് ഈ അവസരം ഉപയോഗപ്പെടുത്താം.
2020 ഏപ്രില്‍ 1 മുതല്‍ 2024 മാർച്ച്‌ 31 വരെയുള്ള നികുതിയും അധിക നികുതിയും പലിശയും ഉള്‍പ്പെടുന്ന ആകെ തുകയുടെ 30 ശതമാനം മാത്രം ട്രാൻസ്‌പോർട്ട് വാഹനങ്ങള്‍ക്കും 40 ശതമാനം മാത്രം നോണ്‍ ട്രാൻസ്‌പോർട്ട് വാഹനങ്ങള്‍ക്കും ഒടുക്കി നികുതി ബാദ്ധ്യത ഒഴിവാക്കാം. 2020 മാർച്ച്‌ 31 വരെയുള്ള നികുതി കുടിശിക പൂർണ്ണമായും ഒഴിവാക്കി.
വാഹന രജിസ്‌ട്രേഷൻ നിലനില്‍ക്കുന്ന ആർടിഒ/ സബ് ആർ ടി ഓഫീസുകളില്‍ കുടിശിക തീർപ്പാക്കാൻ സൗകര്യമുണ്ട്. പദ്ധതി പ്രകാരം നികുതി ഒടുക്കുന്നതിന് രജിസ്‌ട്രേഷൻ സർട്ടിഫിക്കറ്റ്, ഇൻഷ്വറൻസ് സർട്ടിഫിക്കറ്റ്, മോട്ടോർ തൊഴിലാളി ക്ഷേമനിധി വരിസംഖ്യ അടച്ച രശീത് എന്നിവ ആവശ്യമില്ല. വാഹനം സംബന്ധിച്ച്‌ രജിസ്‌ട്രേഡ് ഉടമക്ക് അറിവില്ലാതിരിക്കുകയോ വാഹനം മോഷണം പൊയെങ്കിലോ വാഹനം പൊളിച്ചു കളഞ്ഞെങ്കിലോ വാഹനം നശിച്ചു പോയെങ്കിലോ ഈ പദ്ധതി പ്രകാരം 2024 മാർച്ച്‌ 31 വരെയുള്ള നികുതി ബാധ്യത തീർക്കാം.
എന്തെങ്കിലും കാരണവശാലും വാഹനം നിരത്തില്‍ സർവീസ് നടത്തുന്നതായി കണ്ടെത്തിയാല്‍ 2024 ഏപ്രില്‍ 1 മുതലുള്ള നികുതി ഒടുക്കണമെന്നുള്ള വ്യവസ്ഥയ്ക്ക് വിധേയമായി തുടർന്നുള്ള നികുതി ബാധ്യതയില്‍ നിന്നും ഒഴിവാക്കും. വിശദ വിവരങ്ങള്‍ മോട്ടോർ വാഹന വകുപ്പ് ഓഫീസുകളില്‍ ലഭിക്കും.
Post a Comment