നാലുമാസം മുൻപാണ് അഞ്ജുവും നന്ദുവും വിവാഹിതരായത്. വിവാഹം കഴിഞ്ഞ് ഒരാഴ്‌ചയ്‌ക്കുള്ളില്‍തന്നെ സ്‌ത്രീധനം കുറഞ്ഞുപോയെന്നാരോപിച്ച്‌ അഞ്ജുവിനെ ഭർതൃവീട്ടുകാർ പീ‌ഡിപ്പിക്കാൻ തുടങ്ങിയെന്നാണ് പരാതിയിലുള്ളത്. വിവാഹം കഴിഞ്ഞ് ഒരുമാസത്തിന് ശേഷം നന്ദു സൗദിയിലേക്ക് പോയി. പിന്നീട് അ‌ഞ്ജുവിനെയും കൊണ്ടുപോയി. അവിടെയും അതിക്രൂര മർദനത്തിന് ഇരയായെന്നാണ് യുവതിയുടെ പരാതി.
വീട്ടിലെ ഇടികല്ല്, കുക്കർ, ലാപ്‌ടോപ്പിന്റെ ചാർജർ തുടങ്ങി കൈയില്‍ കിട്ടുന്നതെന്തും തന്നെ ഉപദ്രവിക്കാനായി ഉപയോഗിക്കുമായിരുന്നെന്നും യുവതി പറയുന്നു. യുവതിയുടെ ശരീരത്തിലാകമാനം മർദനമേറ്റ പാടുകളുണ്ട്. കത്തികാട്ടി ഭീഷണിപ്പെടുത്തിയ ശേഷം താൻ മോശം സ്‌ത്രീയാണെന്ന തരത്തില്‍ കുറ്റസമ്മതം നടത്തുന്നതിന്റെ ഓഡിയോ ക്ലിപ്പുകള്‍ റെക്കോർഡ് ചെയ്യുമായിരുന്നെന്നും യുവതി പറയുന്നു.
'കത്തികാട്ടി ഭീഷണിപ്പെടുത്തി ഞാനൊരു വൃത്തികെട്ട പെണ്ണാണെന്ന രീതിയിലുള്ള ഓഡിയോ ക്ലിപ്പുകള്‍ റെക്കോർഡ് ചെയ്യും. ഇതെന്റെ വീട്ടുകാർക്കും നാട്ടുകാർക്കും അയച്ചുകൊടുക്കും. എല്ലാവരും അത് വിശ്വസിച്ചു. ഞാനൊരു മോശം പെണ്ണാണെന്ന രീതിയില്‍ കുറ്റസമ്മതം നടത്തുന്ന ഓഡിയോ ക്ലിപ്പുകളായിരുന്നു അതെല്ലാം. എന്റെ അക്കൗണ്ടിലുണ്ടായിരുന്ന പണമെല്ലാം കൈവശപ്പെടുത്തി'- യുവതി പറയുന്നു. ഭർത്താവിന് സംശയരോഗമാണെന്നും പലപ്പോഴും ദ്വന്ത്വവ്യക്തിത്വമാണ് കാണിക്കാറുള്ളതെന്നും യുവതി ആരോപിക്കുന്നു.
'എന്റെ അടിവയറ്റില്‍ ചവിട്ടി. പ്രൈവറ്റ് പാർട്ടില്‍ അടിച്ചു. പൊലീസ് മൊഴിയെടുക്കാൻ വന്നപ്പോള്‍ ഇക്കാര്യങ്ങളൊക്കെ പറഞ്ഞിരുന്നെങ്കിലും അതൊന്നും രേഖപ്പെടുത്തിയില്ല. ഭർത്താവിന് പാർട്ടിയില്‍ ഹോള്‍ഡുണ്ട്. അതുകൊണ്ട് അക്കാര്യങ്ങളെല്ലാം രേഖപ്പെടുത്തിയിട്ടുണ്ടോയെന്നുപോലും അറിയില്ല'- യുവതി പറയുന്നു.
Post a Comment