തിരുവനന്തപുരം: സംസ്ഥാനത്ത് മഴ കനത്ത സാഹചര്യത്തിൽ അടിയന്തര കാലാവസ്ഥാ മുന്നറിയിപ്പുകൾ ജനങ്ങളിൽ എത്തിക്കുന്നതിനായി കേന്ദ്ര-സംസ്ഥാന സർക്കാരുകളുടെ സംയുക്ത മൊബൈൽ ബ്രോഡ്കാസ്റ്റിങ് അലേർട്ട് സിസ്റ്റം കേരളത്തിലും പ്രവർത്തനം ആരംഭിച്ചു. മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് എന്നീ വടക്കൻ ജില്ലകളിലാണ് ആദ്യഘട്ടത്തിൽ ഇത് ഔദ്യോഗികമായി നടപ്പിലാക്കി തുടങ്ങിയത്.
ദുരന്തനിവാരണ അതോറിറ്റിയും ടെലികമ്മ്യൂണിക്കേഷൻ വകുപ്പും ചേർന്നാണ് ഈ അത്യാധുനിക സംവിധാനം ഒരുക്കിയിരിക്കുന്നത്. പ്രകൃതിദുരന്തങ്ങൾ, കനത്ത മഴ, മറ്റ് അടിയന്തര സാഹചര്യങ്ങൾ എന്നിവ ഉണ്ടാകുമ്പോൾ ഒരേസമയം ലക്ഷക്കണക്കിന് ആളുകളിലേക്ക് മുന്നറിയിപ്പ് സന്ദേശം എത്തിക്കാൻ ഇതിലൂടെ സാധിക്കും.
സൈലൻ്റ് ആക്കിയാലും രക്ഷയില്ല; ഫോൺ തനിയെ ഒച്ചവെക്കും!
പലരെയും അത്ഭുതപ്പെടുത്തുന്നതും (ചിലരെ പേടിപ്പിക്കുന്നതുമായ) പ്രത്യേകത എന്തെന്നാൽ, നിങ്ങളുടെ മൊബൈൽ ഫോൺ 'സൈലൻ്റ് മോഡിലോ' അല്ലെങ്കിൽ 'ഡു നോട്ട് ഡിസ്റ്റർബ് (DND)' മോഡിലോ ആണെങ്കിൽ പോലും ഈ അലേർട്ട് കൃത്യമായി ഫോണിൽ എത്തും. സാധാരണ മെസ്സേജുകൾ പോലെ വിറയ്ക്കുക മാത്രമല്ല, ഉയർന്ന ശബ്ദത്തിലുള്ള ഒരു പ്രത്യേക ടോണോട് കൂടിയാണ് ഈ സന്ദേശം സ്ക്രീനിൽ തെളിയുക.
"പെട്ടെന്ന് ഫോൺ വലിയ ശബ്ദത്തിൽ നിലവിളിക്കാൻ തുടങ്ങിയാൽ ആരും പേടിച്ച് ഫോൺ ദൂരേക്ക് എറിയരുത്, അത് സർക്കാരിൻ്റെ വക മുന്നറിയിപ്പാണ്!" എന്ന് ഇതിനകം തന്നെ സോഷ്യൽ മീഡിയയിൽ ട്രോളുകൾ ഇറങ്ങിക്കഴിഞ്ഞു. ക്ലാസ് മുറികളിലും ഓഫീസ് മീറ്റിംഗുകളിലും ഇരിക്കുന്നവർക്ക് ഈ സിസ്റ്റം വരുംദിവസങ്ങളിൽ ചെറിയ രീതിയിൽ 'പണി' തരുമെങ്കിലും സംഗതി ജീവൻ രക്ഷിക്കാനുള്ളതാണെന്ന് അധികൃതർ വ്യക്തമാക്കുന്നു.
Post a Comment