ഇടുക്കിയില്‍ കെഎസ്‌ആര്‍‌ടിസി ഡീലക്‌സ് ബസ് കൊക്കയിലേക്ക് മറിഞ്ഞ് മൂന്ന് മരണം

ഇടുക്കി: വിനോദയാത്രാ സംഘം സഞ്ചരിച്ചിരുന്ന കെഎസ്‌ആർ‌ടി‌സി ബസ് കൊക്കയിലേക്ക് മറിഞ്ഞുണ്ടായ അപകടത്തില്‍ മൂന്ന് മരണം.

ഇടുക്കി പുല്ലുപാറയില്‍ ഇന്ന് രാവിലെ ആറര മണിയോടെയാണ് ദാരുണമായ അപകടം ഉണ്ടായത്. രണ്ട്‌ സ്‌ത്രീകളും ഒരു പുരുഷനുമാണ് മരിച്ചത്. ഇവരുടെ പേരുവിവരങ്ങള്‍ പുറത്തുവന്നിട്ടില്ല. ഇടുക്കിയില്‍ കുട്ടിക്കാനത്തിനും മുണ്ടക്കയത്തിനും ഇടയിലാണ് അപകടസ്ഥലം. 30 അടി താഴ്‌ചയിലേക്ക് ബസ് മറിയുകയായിരുന്നു.മാവേലിക്കരയില്‍ നിന്നും തഞ്ചാവൂരിലേക്ക് വിനോദയാത്ര പോയ സംഘം സഞ്ചരിച്ച ഡീലക്‌സ് ബസാണ് അപകടത്തില്‍ പെട്ടത്. 

34 യാത്രക്കാർ അപകടസമയം ബസിലുണ്ടായിരുന്നു. അപകടം നടന്നയുടൻ ബസിലുള്ളവരെ പുറത്തെത്തിച്ചു. പൊലീസും നാട്ടുകാരും ചേർന്ന് നടത്തിയ രക്ഷാപ്രവർത്തനത്തിലാണ് ഇവരെ പുറത്തെത്തിക്കാനായത്. ബസ് ഉയർത്താനുള്ള ശ്രമം ഇപ്പോഴും തുടരുകയാണ്.

തഞ്ചാവൂരില്‍ നിന്ന് തിരികെ മാവേലിക്കരയിലേക്ക് വരുമ്ബോഴായിരുന്നു അപകടം. ഇന്ന് പുലർച്ചെ അഞ്ചോടെ മാവേലിക്കരയില്‍ എത്തേണ്ട ബസാണിത്. ആറ് മണിയോടെയാണ് അപകടം ഉണ്ടായത്.

പരിക്കുള്ളവരെ പീരുമേട്, മുണ്ടക്കയം എന്നിവിടങ്ങളിലെ ആശുപത്രികളില്‍ പ്രവേശിപ്പിച്ചു. അതേസമയം താഴേക്ക് പതിച്ച ബസ് ഒരു മരത്തില്‍ തട്ടി നിന്നതിനാല്‍ കൂടുതല്‍ ദുരന്തം ഒഴിവായി. 30 അടി താഴ്‌ചയിലാണ് ബസ് മരത്തില്‍ തങ്ങി നിന്നത്. ബസിന്റെ ബ്രേക്ക് നഷ്‌ടമായതാണ് അപകട കാരണം എന്ന് ഡ്രൈവർ പറഞ്ഞതായാണ് വിവരം. വലിയ വളവുകളുള്ള ഇവിടെ കഴിഞ്ഞ ദിവസവും അപകടം നടന്നിരുന്നു. ശബരിമല തീർത്ഥാടകർ സഞ്ചരിച്ച വാഹനമാണ് മുൻ‌പ് അപകടത്തില്‍ പെട്ടത്.