ആലക്കോട്: ദേശീയപാത കഴിഞ്ഞാല് ജില്ലയില് ഏറ്റവും കൂടുതല് വാഹന സഞ്ചാരമുള്ള മലയോര ഹൈവേയിലെ ആലക്കോട്-രയറോം പാലത്തിന്റെ തൂണും അടിക്കെട്ടും കോണ്ക്രീറ്റ് അടർന്ന് തകർച്ചാ ഭീഷണി നേരിടുന്നു.
1980 കളില് പണിതതാണ് പാലം. മലയോര ഹൈവേയിലെ കണ്ണൂർ, വയനാട്, കാസർഗോഡ് ജില്ലകളെ ബന്ധിപ്പിക്കുന്ന പ്രധാന പാതയാണിത്.
ദീർഘദൂര ബസുകള്, ലോറികള്, ടാങ്കർ ലോറികള്, കരിങ്കല് ഉത്പന്നങ്ങള് നിറച്ച ഭാരവാഹനങ്ങള് എന്നിവയുടെ നിരന്തര ഓട്ടവും, മഴക്കാലത്ത് കുടക്ക് വനത്തിലെ ഉരുള്പൊട്ടലില് ഒഴുകിയെത്തുന്ന മരങ്ങള് വന്നിടിക്കുന്നതും പാലത്തിന്റെ കോണ്ക്രീറ്റ് തൂണുകളെ ദുർബലമാക്കി.
പുഴയിലുള്ള തൂണുകളുടെ കോണ്ക്രീറ്റ് അടർന്ന് തുരുമ്ബിച്ച കമ്ബികള് പുറത്തേക്ക് തള്ളിയിട്ടുണ്ട്. മേല്ഭാഗത്ത് റോഡിലും കോണ്ക്രീറ്റ് അടർന്നിട്ടുണ്ട്.
അടിയന്തരമായി അറ്റകുറ്റപ്പണി നടത്തിയാല് പാലം കുറേക്കാലംകൂടി സംരക്ഷിക്കാനാകുമെന്ന് നാട്ടുകാർ പറയുന്നത്.
പാലത്തിന്റെ തകർച്ചാഭീഷണി വിദഗ്ധർ പരിശോധിച്ച് അറ്റകുറ്റപ്പണിചെയ്ത് സുരക്ഷിത്വത്വം ഉറപ്പാക്കണമെന്നും യാത്രക്കാരുടെ ജീവൻ അപകടത്തിലാകാൻ കാരണമാകരുതെന്നും നാട്ടുകാർ ആവശ്യപ്പെട്ടു.
Post a Comment