ഇ- സ്റ്റാമ്ബ് പദ്ധതി നടപ്പായില്ല: മുദ്രപ്പത്രത്തിന് കടുത്ത ക്ഷാമം 50 രൂപയുടേതിന് പകരം 500ന്റേത് വാങ്ങിക്കണം

കണ്ണൂർ: ഇ- സ്റ്റാമ്ബ് പദ്ധതി പൂർണമായും നടപ്പിലാക്കുന്നതിലുള്ള വീഴ്ച കാരണം മുദ്രപ്പത്രങ്ങളുടെ ക്ഷാമം രൂക്ഷമായി.

കണ്ണൂർ ജില്ലയില്‍ 50, 100, 200 രൂപയുടെ മുദ്ര പത്രങ്ങള്‍ക്കാണ് കൂടുതല്‍ ക്ഷാമമെങ്കില്‍ ചില ജില്ലകളില്‍ 1000 രൂപയില്‍ താഴെയുള്ള എല്ലാ മുദ്രപത്രങ്ങള്‍ക്കും കടുത്തക്ഷാമം നേരിടുന്നതായാണ് പറയുന്നത്. പലർക്കും 50, 100, 200 രൂപയുടെ മുദ്രപത്രങ്ങളുടെ ആവശ്യം നിവർത്തിക്കാനായി 500 രൂപ നല്കി മുദ്രപ്പത്രം വാങ്ങിക്കേണ്ട സ്ഥിതിയാണ്. പൊതുജനങ്ങളും വ്യാപാരികളും ഏറേ പ്രയാസം അനുഭവിക്കുകയാണ്.

കഴിഞ്ഞ വർഷം തന്നെ നടപ്പിലാക്കുമെന്ന് അറിയിച്ചിരുന്ന ഇ- സ്റ്റാമ്ബ് പദ്ധതി ആഗസ്റ്റ് ഒന്ന് മുതല്‍ നിലവില്‍ വരുമെന്ന് സർക്കാർ വാഗ്ദാനം നല്‍കിയിരുന്നു. ജനന സർട്ടിഫിക്കറ്റുകള്‍, ഓഫീസുകളില്‍ സമർപ്പിക്കുന്ന മറ്റു രേഖകള്‍, വാടക-വ്യാപാര കരാറുകള്‍, ബോണ്ടുകള്‍ക്ക് സത്യവാങ്മൂലം തയ്യാറാക്കുന്നതിന് തുടങ്ങിയ ആവശ്യങ്ങള്‍ക്ക് 50,100 രൂപയുടെ സ്റ്റാമ്ബ് പേപ്പറുകള്‍ നിർബന്ധമാണ്. എന്നാല്‍ കഴിഞ്ഞ അഞ്ചു മാസമായി ഇത്തരം മുദ്രപത്രങ്ങള്‍ ലഭിക്കുന്നില്ല.

ആഴ്ചയില്‍ തിങ്കള്‍, ബുധൻ, വെള്ളി ദിവസങ്ങളില്‍ മാത്രമാണ് ജില്ലയില്‍ മുദ്രപത്ര വെണ്ടർമാർക്ക് ട്രഷറിയില്‍ നിന്നും സീല്‍ ചെയ്തു വന്ന മുദ്രപത്രങ്ങള്‍ ലഭിക്കുന്നത്. ഇതൊഴിച്ചുള്ള ദിവസങ്ങളിലാണ് മുദ്രപത്രങ്ങള്‍ക്ക് കൂടുതല്‍ ക്ഷാമം നേരിടുന്നത്. പല ജില്ലകളിലേയും സബ് ട്രഷറികളില്‍ നിന്നും താഴ്ന്ന മൂല്യങ്ങളുടെ മുദ്രപത്രങ്ങള്‍ ലഭിക്കുന്നേയില്ല.

അച്ചടി നിറുത്തിയത് തിരിച്ചടി

ഇ-സ്റ്റാമ്ബിംഗ് സംവിധാനം നടപ്പിലാക്കുന്നതിനാല്‍ 100 രൂപയുടെ മുദ്രപ്പത്ര അച്ചടി സർക്കാർ നിർത്തിവച്ചിരുന്നു. പദ്ധതി വൈകിയതു മൂലമാണ് നിലവിലെ ക്ഷാമം ഉണ്ടായത്. 20 രൂപയുടെ പഴയ മുദ്രപത്രങ്ങള്‍ പുനർമൂല്യം ചെയ്ത് 100രൂപയുടെ സീല്‍ പതിച്ചാണിപ്പോള്‍ ആവശ്യക്കാക്ക് നല്‍കുന്നത്. 20 രൂപയുടെ സ്റ്റാമ്ബ് പേപ്പറുകള്‍ തീർന്നാല്‍ സീല്‍ ചെയ്തു നല്‍കാൻ മുദ്രപത്രങ്ങളുമുണ്ടാവില്ല.

100 രൂപയുടെ മുദ്രപത്രം വാങ്ങിക്കാനാണ് ഞാൻ വന്നത്. എന്നാല്‍ ഇവിടെ എത്തിയപ്പോഴാണ് 500 രൂപയുടേത് മാത്രമാണുള്ളതെന്ന് അറിഞ്ഞത്. മറ്റു വഴിയില്ലാത്തതുകൊണ്ട് ഇതു വാങ്ങിക്കേണ്ടി വന്നു. കുറച്ചു കൂടി കഴിഞ്ഞാല്‍ ഇതും കഴിയും. അപ്പോള്‍ 1000 രൂപയുടേത് വാങ്ങിക്കേണ്ടി വരും. സാധാരണക്കാർ എന്തു ചെയ്യും.

-കെ.കൃഷ്ണകുമാർ,താവം

പഴയ 20, 10 രൂപയുടെ സ്റ്റോക്കുള്ള സ്റ്റാമ്ബ് പേപ്പറുകള്‍ റീവാലിഡേറ്റ് ചെയ്ത് 100 രൂപ സീലടിച്ചാണിപ്പോള്‍ സർക്കാർ മുദ്രപത്രങ്ങള്‍ തരുന്നത്. ജനറല്‍ സ്റ്റാമ്ബ് പേപ്പറുകള്‍ വരാൻ ഒരു മാസംകൂടി കഴിയുമെന്നാണ് അറിയാൻ കഴിഞ്ഞത്. ആഴ്ചയില്‍ മൂന്ന് ദിവസം മാത്രമാണ് ട്രഷറിയില്‍ നിന്നും മുദ്രപത്രങ്ങള്‍ ലഭിക്കുന്നത്. സ്റ്റോക്ക് കഴിയുമ്ബോളാണ് 500 രൂപയുടേത് വാങ്ങിക്കേണ്ടി വരുന്നത്.

ജഗദീഷ്, വെണ്ടർ