കണ്ണൂർ ജില്ലയിൽ വൈദ്യുതി ബന്ധം പൂർണ്ണമായും പുന:സ്ഥാപിക്കാൻ രണ്ട് ദിവസം കൂടി എടുത്തേക്കുമെന്ന് കെ എസ് ഇ ബി

കണ്ണൂർ:തുടരുന്ന മഴയും, 25.7.2024 ന് പുലർച്ചെ വീശിയടിച്ച കാറ്റും കണ്ണൂർ ജില്ലയിലെ വൈദ്യുതി മേഖലക്ക് ഭീമമായ നാശനഷ്ടം ഉണ്ടാക്കിയിട്ടുണ്ട്. 

മരങ്ങൾ കടപുഴകി വീണതിന്റെ ഭാഗമായി ജില്ലയിലെ കണ്ണൂർ, പയ്യന്നൂർ, തലശ്ശേരി, ഇരിട്ടി ഇലക്ട്രിക്കൽ ഡിവിഷൻ പരിധിയിൽ എല്ലായിടത്തും വൈദ്യുതി തടസ്സം നേരിട്ടു. 

വൈദ്യുതി ജീവനക്കാർ വൈദ്യുതി പുനസ്ഥാപിക്കാനുള്ള കഠിന പ്രയത്നത്തിലാണ്. പൊട്ടിവീണ ലൈനുകളിൽ നിന്നും ആർക്കും അപകടം സംഭവിക്കാതിരിക്കാൻ വളരെയധികം കരുതലോടെയാണ് പ്രവർത്തികൾ പുരോഗമിക്കുന്നത്. ജില്ലയിൽ എല്ലായിടത്തും നാശനഷ്ടങ്ങൾ സംഭവിച്ചത് വൈദ്യുതി പുനസ്ഥാപനത്തിന് ബുദ്ധിമുട്ട് ഉണ്ടാക്കുന്നുണ്ട്. ജീവനക്കാരും, കരാർ തൊഴിലാളികളും ചേർന്ന് പരമാവധി പ്രവർത്തിയിൽ ഏർപ്പെട്ടുകൊണ്ട് വൈദ്യുതി പുനസ്ഥാപിച്ച് തുടങ്ങിയിട്ടുണ്ട്. എന്നിരുന്നാലും കണ്ണൂർ ജില്ലയിലെ 633 ട്രാൻസ്ഫോർമറുകളിൽ ഇനിയും വൈദ്യുതി എത്തിക്കുവാൻ ഉണ്ട്. 

607 എണ്ണം  ഹൈടെൻഷൻ പോസ്റ്റുകളും 3700 എണ്ണം ലോ ടെൻഷൻ പോസ്റ്റുകളും മാറ്റി ലൈൻ തകരാർ പരിഹരിക്കുവാൻ ഉണ്ട്. 42,000 ഓളം ഉപഭോക്താക്കൾക്ക് ഇനിയും വൈദ്യുതി ലഭ്യമാക്കാൻ ഉണ്ട്. കാറ്റ് ഇനിയും വീശിയില്ല എങ്കിൽ ഇന്ന് വൈകുന്നേരത്തോടെ പരമാവധി ആളുകൾക്ക് വൈദ്യുതി എത്തിക്കാനാകും. നാളെ വൈകുന്നേരത്തോടെ മുഴുവൻ തകരാറും പരിഹരിച്ച് മുഴുവൻ ഉപഭോക്താക്കൾക്കും വൈദ്യുതി എത്തിക്കാനുള്ള കഠിനപരിശ്രമത്തിലാണ് വൈദ്യുതി ജീവനക്കാർ. മുഴുവൻ ഉപഭോക്താക്കളുടെയും സഹകരണം  ആവശ്യമാണ്. 

വൈദ്യുതി തടസ്സം, ലൈൻ തകരാർ എന്നിവ അറിയിക്കുന്നതിന് വേണ്ടി കെഎസ്ഇബിയുടെ കസ്റ്റമർ കെയർ നമ്പർ 9496001912 ൽ ബന്ധപ്പെടാവുന്നതാണ്. അതുപോലെ കണ്ണൂർ, തലശ്ശേരി പ്രദേശങ്ങളിലെ വൈദ്യുതി തടസ്സം സംബന്ധിച്ച് കൺട്രോൾ റൂം നമ്പർ 9496011176, പയ്യന്നൂർ, ഇരിട്ടി ഭാഗങ്ങളിലെ വൈദ്യുതി തടസ്സങ്ങൾ അറിയിക്കുന്നതിനു് ശ്രീകണ്ഠാപുരം കൺട്രോൾ റൂം നമ്പർ 9496018618 ലും ബന്ധപ്പെടാവുന്നതാണ്.

#CollectorKNR #WeAreKannur #KSEB