ന്യൂഡല്ഹി: കോവിഡ് പ്രതിരോധ വാക്സിനായ ഭാരത് ബയോടെക്കിന്റെ കോവാക്സിൻ എടുത്തവർക്കും പാർശ്വഫലങ്ങളെന്ന് പഠന റിപ്പോർട്ട്.
കോവാക്സിനെടുത്ത മൂന്നിലൊരാള്ക്കും പാർശ്വഫലങ്ങളുണ്ടായിട്ടുണ്ടെന്നാണ് പഠനത്തില് പറയുന്നത്. ബനാറസ് ഹിന്ദു സർവകലാശാല നടത്തിയ പഠനത്തിലാണ് ഈ കണ്ടെത്തലുള്ളത്. ജർമനി ആസ്ഥാനമായുള്ള സ്പ്രിംഗർഇങ്ക് എന്ന ജേർണലിലാണ് പഠനം പ്രസിദ്ധീകരിച്ചിരിക്കുന്നത്.
വാക്സിന് എടുത്ത മൂന്നില് ഒരാള്ക്കും ശ്വസനേന്ദ്ര അണുബാധയുണ്ടായതായി കണ്ടെത്തി. കോവാക്സിന് എടുത്ത 926 പേരെയാണ് പഠനത്തിന് വിധേയമാക്കിയത്. അതില് അന്പത് ശതമാനം പേര്ക്കും വിവിധ തരത്തിലുള്ള പാര്ശ്വഫലങ്ങള് ഉണ്ടായതായി കണ്ടെത്തി. പലര്ക്കും ശ്വാസകോശ സംബന്ധമായ അണുബാധയും, ഹൃദയാഘാതങ്ങള്, ഞരമ്ബിനെ ബാധിക്കുന്ന അസുഖങ്ങള് ഉണ്ടായതായും കണ്ടെത്തി.
വാക്സിന് എടുത്ത നാലുപേര് മരിച്ചതായും പഠനത്തില് പറയുന്നു. ഒരാളുടെ മരണം ഹൃദയാഘാതമൂലമാണെന്നും മറ്റുളളവരുടെ മരണം മറ്റ് പാര്ശ്വഫലങ്ങള് മൂലമാണെന്നും പഠനത്തില് പറയുന്നു. ആർത്തവ സംബന്ധമായ തകരാറുകള്, ഹൈപോതൈറോയ്ഡിസം, പക്ഷാഘാതം, ഗീലന് ബാര് സിന്ഡ്രോം തുടങ്ങിയവയും വാക്സിനു പിന്നാലെ റിപ്പോർട്ട് ചെയ്തതായി പഠനത്തില് പറയുന്നു.
കോവിഷീല്ഡ് വാക്സിന്റെ പാർശ്വഫലങ്ങളേക്കുറിച്ച് നിർമാതാക്കളായ ആസ്ട്രസെനക്ക തുറന്നുപറയുകയും ആഗോളതലത്തില്നിന്ന് അത്പിൻവലിക്കുകയും ചെയ്തതിനു പിന്നാലെയാണ് ഈ പഠനം പുറത്തുവന്നിരിക്കുന്നത്. കോവിഷീല്ഡ് വിവാദങ്ങള്ക്കു പിന്നാലെ കോവാക്സിന് പാർശ്വഫലങ്ങളൊന്നുമില്ലെന്ന് വ്യക്തമാക്കി ഭാരത് ബയോടെക് നേരത്തേ രംഗത്തെത്തിയിരുന്നു.
Post a Comment