വീണ്ടും ഒന്നാമതായി കേരളം; തൊഴിലുറപ്പ് പദ്ധതിയുടെ സോഷ്യല്‍ ഓഡിറ്റിങ്ങില്‍ രാജ്യത്ത് ഒന്നാം സ്ഥാനം

രാജ്യത്ത് തന്നെ ദേശീയ ഗ്രാമീണ തൊഴിലുറപ്പ് പദ്ധതിയുടെ സോഷ്യല്‍ ഓഡിറ്റിങ്ങില്‍ ഒന്നാം സ്ഥാനം നേടി കേരളം. കേന്ദ്ര ഗ്രാമവികസന മന്ത്രാലയം പ്രസിദ്ധീകരിച്ച കണക്കുപ്രകാരം 2023- 24 സാമ്ബത്തിക വര്‍ഷത്തെ ആദ്യ ആറുമാസത്തെ സോഷ്യല്‍ ഓഡിറ്റ് വിവരങ്ങളെ അടിസ്ഥാനമാക്കിയാണ് കേരളം ഒന്നാം സ്ഥാനം കരസ്ഥമാക്കിയത്.

മറ്റു സംസ്ഥാനങ്ങളെല്ലാം ബഹുദൂരം പിന്നിലാണ് എന്നതാണ് കേരളത്തിന്റെ നേട്ടത്തെ പ്രത്യേകതയുള്ളതാക്കുന്നത്. കേന്ദ്ര ഗ്രാമവികസന മന്ത്രാലയം പ്രസിദ്ധീകരിച്ച കണക്ക് പ്രകാരം 2023- 24 സാമ്ബത്തിക വര്‍ഷത്തിലെ ആദ്യ ആറുമാസം കേരളം 99.5 ശതമാനം പഞ്ചായത്തുകളുടെയും ഗ്രാമസഭകളും പബ്ലിക് ഹിയറിങ്ങുകളും പൂര്‍ത്തിയാക്കിയിട്ടുണ്ട്.

ഒഡീഷയും ബീഹാറും ആണ് രണ്ടും മൂന്നും സ്ഥാനത്തുള്ളത്. 64.8% രണ്ടാം സ്ഥാനത്തുള്ള ഒഡീഷ കരസ്ഥമാക്കിയപ്പോള്‍ 62.6 ശതമാനം ഭൗതിക നേട്ടമാണ് നേടാനായത്. ഇന്ത്യയിലെ നാല് സംസ്ഥാനങ്ങള്‍ മാത്രമാണ് 60 ശതമാനത്തിലധികം പുരോഗതി കൈവരിച്ചിരിച്ചത്. 2023- 24 സാമ്ബത്തിക വര്‍ഷത്തെ ആദ്യ ആറുമാസ സോഷ്യല്‍ ഓഡിറ്റ് പൂര്‍ത്തിയായപ്പോള്‍ 99.5% ഭൗതിക പുരോഗതി നേടിയ കേരളം സമ്ബൂര്‍ണ്ണ സോഷ്യല്‍ ഓഡിറ്റ് സംസ്ഥാനമായി ഉടൻതന്നെ മാറും. ഇടുക്കി ജില്ലയിലെ ഒരു പഞ്ചായത്തും കോഴിക്കോട് ജില്ലയിലെ നാല് പഞ്ചായത്തുകളും മാത്രമാണ് സോഷ്യല്‍ ഓഡിറ്റ് പ്രവര്‍ത്തനങ്ങള്‍ നടത്താനായി കേരളത്തില്‍ ഇനി ബാക്കിയുള്ളത്.

വരുന്ന ഒരാഴ്ചയ്‌ക്കുള്ളില്‍ ഈ പഞ്ചായത്തുകളുടെ കൂടി സോഷ്യല്‍ ഓഡിറ്റുകള്‍ പൂര്‍ത്തിയാക്കുന്നതോടെ രാജ്യത്തെ സമ്ബൂര്‍ണ്ണ സോഷ്യല്‍ ഓഡിറ്റ് സംസ്ഥാനമായി കേരളം മാറും. 2022- 23 സാമ്ബത്തിക വര്‍ഷത്തിലും സമ്ബൂര്‍ണ്ണ സോഷ്യല്‍ ഓഡിറ്റ് സംസ്ഥാനമായി മാറിയ കേരളം പഞ്ചായത്ത് അടിസ്ഥാനത്തില്‍ സോഷ്യല്‍ ഓഡിറ്റ് നടപ്പാക്കുന്ന രാജ്യത്തെ ഏക സംസ്ഥാനമാണ്.