ഇന്ന് ശ്രീകൃഷ്ണ ജയന്തി, വീഥികള്‍ അമ്പാടിയാകും

 

വീണ്ടുമൊരു ശ്രീകൃഷ്ണ ജയന്തി കൂടി വന്നെത്തിയിരിക്കുകയാണ്. കാര്‍മുകില്‍ വര്‍ണനെ ഭക്തിപുരസ്സരം മനസില്‍ കരുതി കണ്ണനും രാധയുമായി കുട്ടികള്‍ ശോഭായാത്രയില്‍ പങ്കെടുക്കുന്നതാണ് ഏതൊരു ശ്രീകൃഷ്ണ ജയന്തി ദിനത്തിലും എല്ലാവരുടേയും മനസില്‍ എത്തുക.

ഭദ്രപാദയിലെ കൃഷ്ണപക്ഷത്തിലെ അഷ്ടമി തിഥിയിലാണ് ശ്രീകൃഷ്ണന്‍ ജനിച്ചത് എന്നാണ് ഐതിഹ്യങ്ങളില്‍ പറഞ്ഞിരിക്കുന്നത്.

ഇത് പ്രകാരം ഈ ദിവസം വിശ്വാസികള്‍ ശ്രീകൃഷ്ണജയന്തി ആഘോഷിക്കുന്നു. മഹാവിഷ്ണുവിന്റെ എട്ടാമത്തെ അവതാരമായ ശ്രീകൃഷ്ണന്‍ ലോകത്തെ അസുരശക്തികളില്‍ നിന്നും തിന്മകളില്‍ നിന്നും രക്ഷിക്കാനായി പിറവിയെടുത്തു എന്നാണ് വിശ്വാസം. പ്രതാപ ശാലിയും സത്യസന്ധനുമായ ഉഗ്രസേനന്‍ രാജാവിന്റെ മക്കളായിരുന്നു കംസനും ദേവകിയും. ആസുരഭാവത്തോടെയായിരുന്നു കംസന്റെ ജനനം. സഹോദരി ദേവകിയെ വസുദേവരുമായി വിവാഹം കഴിപ്പിച്ച ശേഷം യാത്രയാക്കുന്നതിനിടെ കംസന്‍ ഒരു അശരീരി കേട്ടു. വസുദേവര്‍ക്കും ദേവകിയ്ക്കുമുണ്ടാകുന്ന എട്ടാമത്തെ പുത്രന്‍ കംസന്റെ ജീവനെടുക്കുമെന്നായിരുന്നു അത്. ഇതോടെ കലിപൂണ്ട കംസന്‍ ദേവകിയെ വധിക്കാനാഞ്ഞു. എന്നാല്‍ വസുദേവരും ദേവകിയും കംസന്റെ കാലില്‍ വീണ് കരഞ്ഞു. ഇതോടെ കംസന്‍ ഇരുവരേയും കാരാഗ്രഹത്തിലടയ്ക്കുകയായിരുന്നു._

കാരാഗ്രഹത്തില്‍ വെച്ച്‌ വസുദേവര്‍ക്കും ദേവകിക്കും പിറന്ന ഏഴ് കുഞ്ഞുങ്ങളേയും കംസന്‍ കൊന്നു. എട്ടാമത്തെ കുഞ്ഞായി ജനിച്ച കണ്ണനെ വസുദേവര്‍ ആരുമറിയാതെ മാറ്റി. കണ്ണന്‍ പിറന്ന അതേ ദിവസം തന്നെ വൃന്ദാവനത്തിലെ നന്ദഗോപര്‍ക്കും യശോദയ്ക്കും ഒരു പെണ്‍കുഞ്ഞ് പിറന്നിരുന്നു. ആ കുഞ്ഞുമായി കണ്ണനെ മാറ്റിയ വസുദേവര്‍ കംസനോട് തങ്ങള്‍ക്ക് ജനിച്ചത് പെണ്‍കുഞ്ഞാണെന്നും ആണ്‍കുട്ടി ജനിച്ചാല്‍ ആണ് ദോഷകരം എന്നായിരുന്നു അശരീരിയിലുണ്ടായിരുന്നത് എന്നും പറഞ്ഞു.

ഇത് കേട്ട കംസന്‍ മടങ്ങി പോകുകയായിരുന്നു. കണ്ണനാകട്ടെ വൃന്ദാവനത്തില്‍ നന്ദഗോപരുടേയും യശോദയുടേയും മകനായി വളര്‍ന്നു. ബാല്യത്തിലും കൗമാരത്തിലുമെല്ലാം ദുഷ്ടശക്തികളെ ഉന്മൂലനം ചെയ്ത കണ്ണന്‍ ഗ്രാമവാസികളുടെ കണ്ണിലുണ്ണിയായി വളര്‍ന്നു. പിന്നീടങ്ങോട്ട് കണ്ണന്റെ ലീലകളാല്‍ സമ്പന്നമാണ് ഐതിഹ്യങ്ങള്‍. എവിടെയാണോ ധര്‍മ്മച്യുതിയുണ്ടാവുന്നത് അവിടെ ഭഗവാന്‍ അവതരിക്കുന്നു എന്നാണ് ഹൈന്ദവ വിശ്വാസം

ശ്രീകൃഷ്ണ ജയന്തിയോട് അനുബന്ധിച്ച്‌ കേരളത്തിലും വിപുലമായ ആഘോഷങ്ങള്‍ ആണ് നടക്കുന്നത്. ബാലഗോകുലങ്ങളുടെ നേതൃത്വത്തില്‍ ജില്ലയില്‍ നൂറോളം ശോഭയാത്രകള്‍ നടക്കും. ഇതിന്റെ ഭാഗമായി ഗോപൂജ, ഉറിയടി, സാംസ്കാരിക സമ്മേളനം എന്നിവയും ഉണ്ടാകും. മഹാ ശോഭയാത്രയിൽ ആയിരക്കണക്കിന് കുട്ടികള്‍ ശ്രീകൃഷ്ണ - രാധാ വേഷം ധരിച്ചും പുരാണ വേഷം ധരിച്ചും ശോഭയാത്രയില്‍ പങ്കെടുക്കും. ചെറുശോഭയാത്രകള്‍ വൈകീട്ട് മൂന്നിന് വിവിധ സ്ഥലങ്ങളില്‍ ആരംഭിക്കും. നാടും നഗരവും വൃന്ദാവനമാകും.