എസ്.ബി.ഐയില് അക്കൗണ്ടില്ലാത്തവര്ക്കും ബാങ്കിന്റെ യോനോ ആപ് ഉപയോഗിച്ച് ഇനി മുതല് യു.പി.ഐ ഇടപാടുകള് നടത്താം
യോനോ ഇനി എല്ലാ ഇന്ത്യക്കാരുടേതുമായി മാറാൻ പോവുകയാണ്. ഇതിന്റെ ഭാഗമായി ആപ് ഉപയോഗിച്ച് എത് ബാങ്കില് അക്കൗണ്ടുള്ളയാള്ക്കും യു.പി.ഐ ഇടപാട് നടത്താമെന്ന് എസ്.ബി.ഐ അറിയിച്ചു.
എസ്.ബി.ഐയുടെ യോനോ ആപ് ഗൂഗ്ളിന്റെ പ്ലേ സ്റ്റോറിലും ആപ്പിളിന്റെ ആപ് സ്റ്റോറിലും ലഭ്യമാണ്. ഇത് ഡൗണ്ലോഡ് ചെയ്തതതിന് ശേഷം അതിലെ രജിസ്റ്റര് നൗ ഓപ്ഷൻ ഉപയോഗിച്ച് മറ്റ് ബാങ്കില് അക്കൗണ്ടുള്ളവര്ക്ക് യോനോ ഉപയോഗിച്ച് യു.പി.ഐ സേവനം ലഭിക്കും. ഇതിനായി രജിസ്റ്റര് നൗ ഓപ്ഷനില് ക്ലിക്ക് ചെയ്തതിന് ശേഷം രജിസ്റ്റര് ടു മേക്ക് യു.പി.ഐ പേയ്മെന്റ് എന്ന ഓപ്ഷനില് ക്ലിക്ക് ചെയ്ത് ബാങ്കുമായി ബന്ധിപ്പിച്ച മൊബൈല് നമ്ബര് നല്കണം.
ഇതിന് ശേഷം എസ്.എം.എസ് ഉപയോഗിച്ച് മൊബൈല് നമ്ബറിന്റെ വെരിഫിക്കേഷൻ പൂര്ത്തിയാക്കണം. പിന്നീട് ഏത് ബാങ്കിലാണോ അക്കൗണ്ട് ഉള്ളത് അത് സെലക്ട് ചെയ്ത് യു.പി.ഐ ഐ.ഡിയുണ്ടാക്കാം. ഇതിന് ശേഷം ആപിലേക്ക് കയറാനുള്ള ആറക്ക എംപിൻ കൂടി നല്കി രജിസ്ട്രേഷൻ പൂര്ത്തിയാക്കാം.
ഫോണ്പേ, ഗൂഗ്ള് പേ ആപുകളില് ലഭിക്കുന്ന ക്യൂ.ആര് കോഡ് സ്കാൻ ചെയ്ത് പണമയക്കല്, ഒരു അക്കൗണ്ടില് നിന്നും മറ്റൊന്നിലേക്ക് പണമയക്കല്, ഫോണ് കോണ്ടാക്ടുകളിലേക്ക് പണമയക്കല് തുടങ്ങിയ സേവനങ്ങളെല്ലാം യോനോയിലും ലഭിക്കും. യു.പി.ഐ രംഗത്തേക്ക് കടക്കുന്നതിലൂടെ ഫോണ്പേ, പേടിഎം, ഗൂഗ്ള് പേ തുടങ്ങിയവക്ക് വെല്ലുവിളി ഉയര്ത്തുകയാണ് എസ്.ബി.ഐ ലക്ഷ്യം.
Post a Comment