കൊച്ചി: വിവാഹ ഓട്ടത്തിനുവിളിച്ച കെഎസ്ആര്ടിസി ബസില് വാഴയും തെങ്ങോലയും ഇലകളും വച്ച് അലങ്കരിച്ച് "ഈ പറക്കുംതളിക’ സിനിമയിലെ താമരാക്ഷന് പിള്ള ബസ് പോലെയാക്കി യാത്ര നടത്തിയ സംഭവത്തില് ഡ്രൈവറുടെ ലൈസന്സ് മോട്ടോര് വാഹന വകുപ്പ് സസ്പെന്ഡ് ചെയ്തു.
കെഎസ്ആര്ടിസി ഡ്രൈവര് നെല്ലിക്കുഴി സ്വദേശി റഷീദിന്റെ ലൈസന്സാണ് സസ്പെന്ഡ് ചെയ്തത്. നേരത്തെ, കെഎസ്ആര്ടിസി കോതമംഗലം ഡിപ്പോയില് എത്തി ബസ് പരിശോധിച്ച മോട്ടോര് വാഹനവകുപ്പ് നിയമ ലംഘനത്തിന് കേസെടുത്തിരുന്നു.
ഡ്രൈവറുടെ കാഴ്ച മറച്ചതിനും(184) മറ്റ് റോഡ് യാത്രക്കാര്ക്ക് അപകടം വരുത്തുന്ന രീതിയില് ബസില് മരച്ചില്ലകള് വെച്ച് കെട്ടി വാഹനം ഓടിച്ചതിനുമാണ് (177) നടപടി. തിങ്കളാഴ്ച രാവിലെ 11ന് കോതമംഗലം മോട്ടോര് വെഹിക്കിള് ഓഫീസില് വിശദീകരണം നല്കാന് റഷീദ് എത്തിയിരുന്നു.
സുഹൃത്തിന്റെ വിവാഹവുമായി ബന്ധപ്പെട്ടാണ് ബസ് അലങ്കരിച്ചതെന്നും തനിക്ക് അബദ്ധം സംഭവിച്ചതാണെന്നും എല്ലാവരോടും ക്ഷമ ചോദിക്കുന്നുവെന്നും റഷീദ് പറഞ്ഞു.
കോതമംഗലം നെല്ലിക്കുഴിയില് നിന്ന് വരന്റെ ബന്ധുക്കളും സുഹൃത്തുക്കളും അടിമാലി ഇരുമ്പുപാലത്തെ വധൂഗൃഹത്തിലേക്കെത്തിയ കെഎസ്ആര്ടിസി ബസാണ് താമരാക്ഷന്പിള്ളയായി അലങ്കരിച്ചത്.
"പറക്കുംതളിക... ഇതുമനുഷ്യരെ കറക്കുംതളിക' എന്ന പാട്ടുംവെച്ചായിരുന്നു ബസിന്റെ യാത്ര. ഇത് സാമൂഹിക മാധ്യമങ്ങളില് വൈറലായതോടെ വിവാദം പുകഞ്ഞു.
വടക്കഞ്ചേരി അപകടത്തെ തുടര്ന്ന് ടൂറിസ്റ്റ് ബസുകള്ക്കെതിരേ കര്ശന നിയമ നടപടിയെടുത്ത ഗതാഗത വകുപ്പ് കെഎസ്ആര്ടിസിയുടെ നിയമ ലംഘനത്തിന് കൂട്ടുനില്ക്കുകയാണെന്നായിരുന്നു വിമര്ശനം. ഇതോടെയാണ് വിഷയത്തില് ഗതാഗത വകുപ്പ് ഇടപെട്ടത്.
Post a Comment