കണ്ണൂര്‍-മുംബൈ കൂടുതല്‍ സര്‍വീസ്

മട്ടന്നൂർ: കണ്ണൂർ രാജ്യാന്തര വിമാനത്താവളത്തില്‍നിന്ന് വേനല്‍ക്കാല ഷെഡ്യൂളില്‍ ഉള്‍പ്പെടുത്തി എയർ ഇന്ത്യ എക്‌സ്പ്രസ് മുംബൈയിലേക്ക് സർവീസുകള്‍ തുടങ്ങും.

ഞായർ, ബുധൻ, വെള്ളി ദിവസങ്ങളിലാണ് സർവീസുകള്‍. ഏപ്രില്‍ ഒന്നു മുതലാണ് സർവീസ് തുടങ്ങുന്നത്. രാത്രി 10.30ന് മുംബൈയില്‍ നിന്ന് പുറപ്പെട്ട് 12. 20ന് കണ്ണൂരിലെത്തും. തിരികെ പുലർച്ചെ 1. 20ന് പുറപ്പെടുന്ന വിമാനം 3.10ന് മുംബൈയിലെത്തും.

ഇൻഡിഗോ കണ്ണൂർ-മുംബൈ സെക്ടറിലെ സർവീസ് വേനല്‍ക്കാല ഷെഡ്യൂളില്‍ പ്രതിദിനമാക്കി ഉയർത്തും. നിലവില്‍ ആഴ്ചയില്‍ നാലു ദിവസമാണ് മുംബൈ സർവീസ്. യാത്രക്കാരുടെ വർധന കണക്കിലെടുത്ത് ഇൻഡിഗോ ഡല്‍ഹി, അബുദാബി സർവീസുകളില്‍ സീറ്റുകള്‍ വർധിപ്പിക്കാനും തീരുമാനിച്ചിട്ടുണ്ട്. ഇതനുസരിച്ച്‌ എയർബസ് എ 321 വിമാനമാണ് ഇനി സർവീസുകള്‍ക്ക് ഉപയോഗിക്കുക. ഏപ്രില്‍ അവസാനത്തോടെ പുതിയ അന്താരാഷ്ട്ര സർവീസ് തുടങ്ങാനും ഇൻഡിഗോയ്ക്ക് പദ്ധതിയുണ്ട്. മേയില്‍ ബംഗളൂരുവിലേക്ക് ഒരു അധിക സർവീസും ഇൻഡിഗോ തുടങ്ങും. 26 മുതല്‍ നിലവില്‍ വരുന്ന വേനല്‍ക്കാല ഷെഡ്യൂളില്‍ കണ്ണൂരില്‍നിന്ന് അബുദാബിയിലേക്ക് പ്രതിവാരം 17 സർവീസുകളും ഷാർജ, ദോഹ എന്നിവിടങ്ങളിലേക്ക് 12 സർവീസുകളുമുണ്ടാകും. ദുബായിലേക്ക് ആഴ്ചയില്‍ എട്ടു സർവീസും മസ്‌ക്കറ്റിലേക്ക് ഏഴു സർവീസും നടത്തും. ജിദ്ദ, കുവൈത്ത്, റിയാദ് എന്നിവിടങ്ങളിലേക്ക് പ്രതിവാരം രണ്ടു സർവീസുകളും റാസല്‍ഖൈമ, ദമാം എന്നിവിടങ്ങളിലേക്ക് മൂന്നു സർവീസുകളുമുണ്ടാകും. ആഭ്യന്തര സെക്ടറില്‍ ബംഗളൂരു, ചെന്നൈ, കൊച്ചി, ഹൈദരാബാദ്, മുംബൈ, ഡല്‍ഹി എന്നിവിടങ്ങളിലേക്ക് പ്രതിദിന സർവീസുകളുണ്ട്. മുംബൈയിലേക്ക് ആഴ്ചയില്‍ 11 സർവീസുണ്ട്. തിരുവനന്തപുരത്തേക്ക് ആഴ്ചയില്‍ രണ്ട് നേരിട്ടുള്ള സർവീസുകളും കൊച്ചി വഴിയുള്ള പ്രതിദിന സർവീസുമുണ്ട്.