ഒരു ഭരണകൂടം ഇങ്ങനെ ഒരു നീക്കം നടത്തുന്നത് ഒരു പക്ഷെ ആദ്യമായിരിക്കും. രാജ്യത്തെ ജനനനിരക്കിലുണ്ടായ വൻ ഇടിവ് പരിഹരിക്കുന്നതിന് ജനങ്ങളുടെ വിവാഹം നടത്തിക്കൊടുക്കാനുള്ള ശ്രമത്തിലാണ് ടോക്യോ മെട്രോ പൊളിറ്റൻ ഭരണകൂടം.
ഇതിനായി സ്വന്തം ഡേറ്റിങ് ആപ്പും ഭരണകൂടം പുറത്തിറക്കി. ഒരു സ്വകാര്യ സ്ഥാപനവുമായി സഹകരിച്ച് നിർമിച്ച ഈ ആപ്ലിക്കേഷൻ ഈ വേനലില് ലഭ്യമാവുമെന്നാണ് റിപ്പോർട്ടുകള്.
ഒരു സർക്കാർ സേവനത്തിന്റെ എല്ലാ സ്വഭാവങ്ങളോടും കൂടിയാണ് ഈ ആപ്പിന്റെ പ്രവർത്തനം. പണം നല്കിയാണ് ഇത് ഉപയോഗിക്കാനാവുക. നിയമപരമായി വിവാഹിതരല്ലെന്ന് വ്യക്തമാക്കുന്ന രേഖകളും വിവാഹിതരാകാൻ തയ്യാറാണെന്ന് അറിയിച്ചുകൊണ്ടുള്ള ഒരു കത്തും നല്കണം. ഉപഭോക്താവിന്റെ വാർഷിക വരുമാനം വ്യക്തമാക്കുന്നതിനുള്ള നികുതി രേഖയും ഉപഭോക്താവ് നല്കണം.
ഡേറ്റിങ് ആപ്പില് രജിസ്റ്റർ ചെയ്യുന്നതിന് ഉപഭോക്താക്കളുടെ വെരിഫിക്കേഷൻ പൂർത്തിയാക്കുന്നതിന് ഒരു അഭിമുഖവും ഉണ്ടാവും. രജിസ്ട്രേഷൻ പൂർത്തിയായാല് പങ്കാളിയില് ആഗ്രഹിക്കുന്നത് എന്തെല്ലാം ആണെന്ന് വ്യക്തമാക്കണം. അതിനനുസരിച്ച് എഐയുടെ സഹായത്തോടെ അനുയോജ്യമായ ആളുകളെ ആപ്പ് നിർദേശിക്കും.
ജനങ്ങള് പങ്കാളിയെ കണ്ടെത്താനുള്ള ഇത്തരം ശ്രമങ്ങളൊന്നും നടത്തുന്നില്ലെന്നാണ് അധികൃതർ പറയുന്നത്. അവർക്ക് ചെറിയൊരു പ്രോത്സാഹനം നല്കാനാണ് ഞങ്ങള് ആഗ്രഹിക്കുന്നതെന്ന് ആപ്പിന്റെ ടോക്യോ സർക്കാർ ഉദ്യോഗസ്ഥർ പറയുന്നു.
ജപ്പാന്റെ ഈ നീക്കത്തെ സ്പേസ് എക്സ് മേധാവി ഇലോണ് മസ്ക് പ്രശംസിച്ചു. ഈ വിഷയത്തിലെ പ്രാധാന്യം ജപ്പാൻ തിരിച്ചറിഞ്ഞതില് സന്തോഷമുണ്ട്. ജനസംഖ്യയെ പ്രായമാകുന്നത് നേരിടാൻ ഒരു സമൂഹമെന്ന നിലയില് നമ്മുടെ ജനന നിരക്ക് ഉയർത്തണമെന്ന് മിസ്റ്റർ മസ്ക് മുമ്ബ് അഭിപ്രായപ്പെട്ടിട്ടുണ്ട്. വ്യത്യസ്ത പങ്കാളികളിലായി 11 മക്കളുള്ള വ്യക്തി കൂടിയാണ് ഇലോണ് മസ്ക്.
കഴിഞ്ഞ വർഷം ജനനിരക്കിനേക്കാള് ഇരട്ടി മരണ നിരക്കാണ് ജപ്പാനില് രേഖപ്പെടുത്തിയത്.ജനനനിരക്ക് തുടർച്ചയായ എട്ടാം വർഷവും 758,631 ആയി കുറഞ്ഞു. 5.1 ശതമാനം ഇടിവാണുണ്ടായത്. മരണസംഖ്യ 1,590,503 ആയി.
വിവാഹം കഴിക്കാനും കുട്ടികളെ വളർത്താനുമുള്ള സാമ്ബത്തിക സ്ഥിതി ഇല്ലാത്തതാണ് ജപ്പാനിലെ ജനങ്ങള് വിവാഹം ചെയ്യാൻ മടിക്കുന്നതിനുള്ള കാരണങ്ങളിലൊന്ന്. ജനന നിരക്കിലുണ്ടായ ഇടിവ് രാജ്യം നേരിടുന്ന വലിയ പ്രതിസന്ധികളിലൊന്നാണെന്ന് പ്രധാനമന്ത്രി ഫുമിയോ കിഷിദ പറഞ്ഞു. ഇത് പരിഹരിക്കാൻ അടിയന്തിര നടപടികള് സ്വീകരിച്ചുവരികയാണ് ഭരണകൂടം.
Post a Comment