പശ്ചിമേഷ്യയില് നിലനില്ക്കുന്ന കടുത്ത യുദ്ധസമാനമായ സാഹചര്യങ്ങള് ഇന്ത്യയിലെ സാധാരണക്കാരുടെ ആരോഗ്യപരിപാലന ചെലവുകള് കുത്തനെ കൂട്ടുമെന്ന ആശങ്ക ശക്തമാകുന്നു.
അന്താരാഷ്ട്ര തലത്തില് പെട്രോളിയം ഉല്പ്പന്നങ്ങള്ക്കുണ്ടായ ക്ഷാമവും വിതരണ ശൃംഖലയിലെ തടസ്സങ്ങളും കാരണം ഔഷധ നിർമ്മാണത്തിനാവശ്യമായ പ്രധാന ഘടകങ്ങളുടെ വില കുത്തനെ ഉയർന്നതാണ് നിലവിലെ പ്രതിസന്ധിക്ക് കാരണം. ഇതിന് പുറമെ മെഡിക്കല് ഉപകരണ നിർമ്മാണ രംഗത്തെ അസംസ്കൃത വസ്തുക്കളുടെ ലഭ്യതക്കുറവും തിരിച്ചടിയാകുന്നുണ്ട്. നിർമ്മാണച്ചെലവ് കൂടിയതുമൂലമുള്ള വലിയ നഷ്ടം നികത്താൻ വില വർദ്ധിപ്പിക്കണമെന്ന ഔഷധ നിർമ്മാതാക്കളുടെ സമ്മർദ്ദത്തിന് സർക്കാർ വഴങ്ങുകയാണെങ്കില്, വരും മാസങ്ങളില് അതായത് ജൂലൈ മുതല് വിപണിയിലെ വിലനിയന്ത്രണമില്ലാത്ത മരുന്നുകളുടെ വില 10% വരെ കൂടിയേക്കുമെന്നാണ് പ്രവചനം.
ഔഷധ നിർമ്മാണത്തിന് ഏറ്റവും അത്യാവശ്യമായ സക്രിയ ഔഷധ ചേരുവകളുടെ (API - Active Pharmaceutical Ingredients) വില അന്താരാഷ്ട്ര വിപണിയില് കുത്തനെ ഉയരുകയാണ്. കഴിഞ്ഞ ഫെബ്രുവരി മാസം മുതല് ഈ അസംസ്കൃത വസ്തുക്കളുടെ വിലയില് 30 മുതല് 50 ശതമാനം വരെ വർദ്ധനവാണ് രേഖപ്പെടുത്തിയിട്ടുള്ളതെന്ന് പ്രമുഖ ഫാർമസ്യൂട്ടിക്കല് കമ്പനികള് വ്യക്തമാക്കുന്നു. ഇതിന്റെ തുടർച്ചയായി കഴിഞ്ഞ ഏപ്രില്, മേയ് മാസങ്ങളില്ത്തന്നെ വിപണിയിലെ വിലനിയന്ത്രണ പട്ടികയ്ക്ക് പുറത്തുള്ള ചില അവശ്യ മരുന്നുകളുടെ വില കമ്പനികള് നേരിയ തോതില് കൂട്ടിയിട്ടുണ്ടെന്നാണ് പുറത്തുവരുന്ന വിവരങ്ങള്. നിലവിലെ നിയമപ്രകാരം ദേശീയ അവശ്യ ഔഷധ പട്ടികയില് (NLEM) ഉള്പ്പെടാത്ത മരുന്നുകളുടെ വില പ്രതിവർഷം പരമാവധി 10 ശതമാനം വരെ ഉയർത്താൻ നിർമ്മാതാക്കള്ക്ക് നിയമപരമായ അധികാരമുണ്ട്. ഇത്തരം മരുന്നുകളുടെ വില നേരിട്ട് നിശ്ചയിക്കുന്നതില് തദ്ദേശീയ ഔഷധവില നിയന്ത്രണ സമിതിക്ക് (NPPA) പരിമിതമായ അധികാരം മാത്രമാണുള്ളത്.
Post a Comment