സോഷ്യല് മീഡിയ ഇന്ഫ്ളുവന്സറും ടെലിവിഷന് അവതാരകനുമായ കാര്ത്തിക് സൂര്യ മലയാളികള്ക്ക് ഏറെ പരിചിതനാണ്. ഇപ്പോഴിതാ മരണം മുന്നില് കണ്ട അനുഭവം പങ്കിടുകയാണ് കാര്ത്തിക്.കഴിഞ്ഞ ദിവസം തനിക്കുണ്ടായ പേടിപ്പെടുത്തുന്ന അനുഭവമാണ് പുതിയ വീഡിയോയില് കാര്ത്തിക് സൂര്യ പങ്കുവെക്കുന്നത്.
'ഇപ്പോള് ഷൂട്ടില് നില്ക്കേണ്ട ഞാനാണ്. ഇന്നലെ രാത്രി ഭക്ഷണം കഴിക്കാനിരുന്നപ്പോള്, ഭക്ഷണം വായില് വച്ചതും ഞാനൊന്ന് തുമ്മി. തുമ്മിയത് മാത്രമേ എനിക്ക് ഓര്മയുള്ളൂ. കുറച്ച് നേരം കഴിഞ്ഞ് നോക്കിയപ്പോള് കാണുന്നത് ഇവള് എന്റെ മുതുകില് തടവി എന്നെ ഛര്ദ്ദിപ്പിക്കുന്നതാണ്', കാര്ത്തിക് പറയുന്നു.
'ഇന്നലെ കഴിച്ചോണ്ടിരിക്കുമ്പോള് മൂന്ന് വട്ടം തുമ്മി. വെള്ളം എടുത്ത് തിരികെ വന്നപ്പോള് കുഴഞ്ഞു വീണു. ഞാന് പേടിച്ചുപോയി. ഞാന് പിടിച്ചപ്പോഴേക്കും എന്റെ ദേഹത്തേക്ക് വീണു. അനക്കമൊന്നുമില്ല. ഞാന് അവിടെ ഉണ്ടായിരുന്ന രണ്ട് ചേട്ടന്മാരെ വിളിച്ചു. അവര് പിടിച്ചിട്ടൊന്നും കിട്ടുന്നില്ല. വായില് കൂടെ ഒലിക്കുന്നൊക്കെ ഉണ്ടായിരുന്നു. കൈ ഒക്കെ വിറച്ചു. ഞാന് പേടിച്ചു. ആ ചേട്ടന്മാര് നെഞ്ചില് തടവിയപ്പോള് ഛര്ദ്ദിച്ചു തുടങ്ങി. ഭയങ്കര ഛര്ദ്ദിയായിരുന്നു. കണ്ണൊന്നും തുറന്നിരുന്നില്ല. ബോധമുണ്ടായിരുന്നില്ല', ഭാര്യ വര്ഷ പറയുന്നു.
'എനിക്കൊന്നും ഓര്മയില്ല. ആശുപത്രിയില് പോകാം എന്ന് പറഞ്ഞത് മാത്രം ഓര്മയുണ്ട്. പോകുന്ന വഴിയിലും മൂന്നാല് വട്ടം ഛര്ദ്ദിച്ചു. എങ്ങനെയൊക്കയോ ആശുപത്രിയിലെത്തി. അവിടെ കുറേ നേരം കിടന്നു. അവര് എക്സ് റേയും എക്കോയുമെടുത്തു. രക്തം പരിശോധിച്ചു. അവസാനം മനസിലായി, ഭക്ഷണം കഴിച്ചു കൊണ്ടിരിക്കെയാണല്ലോ തുമ്മിയത്. ശ്വാസ കോശത്തിലേക്ക് അതിന്റെ പാര്ട്ടിക്കള് കയറി തലച്ചോറിലേക്കുള്ള ഒക്സിജന് കട്ടായതു കൊണ്ടാണ് ഇങ്ങനെ സംഭവിച്ചത്. അവസാനം ഛര്ദ്ദിച്ചപ്പോഴേക്കും തൊണ്ട മുറിഞ്ഞ് കുറച്ച് ചോര വന്നിരുന്നു', കാര്ത്തിക്കിന്റെ വാക്കുകള്.
അത്ര ടെന്ഷനുള്ള അവസ്ഥയായിട്ടും തന്നെ ആശുപത്രിയിലെത്തിച്ചതും സമയോചിതമായി ഇടപെട്ടതുമെല്ലാം വര്ഷയാണെന്നും കാര്ത്തിക് സൂര്യ പറയുന്നു. ഇപ്പോഴും ആ സമയങ്ങള് ഓര്ക്കാന് ഭയമാണെന്നും കാര്ത്തിക് സൂര്യ വ്ളോഗിലൂടെ പറയുന്നു.
Post a Comment