സ്വര്‍ണവില കുറഞ്ഞു; അമിത പ്രതീക്ഷ വേണ്ട, ആഭരണം വാങ്ങുന്നവര്‍ ചെയ്യേണ്ടത്, ഇന്നത്തെ പവന്‍ വില

കൊച്ചി: കേരളത്തില്‍ സ്വര്‍ണവില ഇന്നും കുറഞ്ഞു. തിങ്കളാഴ്ച രണ്ടു തവണ കുറയുകയും രണ്ടു തവണ ഉയരുകയും ചെയ്തതിന് പിന്നാലെയാണ് ഇന്നത്തെ ഇടിവ്.

സ്വര്‍ണത്തിന് രാജ്യാന്തര വിപണിയില്‍ വില ഉയരുന്നുണ്ട്. എന്നാല്‍ ഇന്ത്യയില്‍ രൂപയുടെ മൂല്യം ഉയര്‍ന്നതാണ് വില കുറയാന്‍ സഹായിച്ചത്. അമേരിക്കയും ഇന്ത്യയും വ്യാപാര കരാറിലെത്തിയത് രൂപയുടെ കരുത്ത് കൂടാന്‍ സഹായിക്കുമെന്ന് പ്രതീക്ഷിക്കുന്നു.

ആഗോള വിപണിയില്‍ സ്വര്‍ണം ഔണ്‍സിന് 4800 ഡോളറായി ഉയര്‍ന്നിട്ടുണ്ട്. കഴിഞ്ഞ ദിവസം 4600 വരെ ഇടിഞ്ഞ ശേഷമാണ് ഉയര്‍ന്നത്. 1.31 ലക്ഷം രൂപ വരെ പവന്‍ വില എത്തിയ ശേഷം വലിയ തോതില്‍ ഇടിഞ്ഞത് ആഭരണം വാങ്ങാനിരുന്നവര്‍ക്ക് പ്രതീക്ഷ നല്‍കിയിരുന്നു. 1.07 ലക്ഷം വരെ കുറഞ്ഞ ശേഷമാണ് ഇന്നലെ ഉച്ചയ്ക്ക് വില കൂടിയത്.

ഇന്നലെ രാവിലെയും ഉച്ചയ്ക്കുമായി 9840 രൂപ ഒരു പവന് കുറഞ്ഞിരുന്നു. ഉച്ചയ്ക്ക് ശേഷം രണ്ടു തവണയായി 4400 രൂപ വര്‍ധിക്കുകയും ചെയ്തു. എന്നാല്‍ ഇന്ന് രാവിലെ 1040 രൂപ കുറയുകയാണ് ചെയ്തത്. 22 കാരറ്റ് സ്വര്‍ണം ഗ്രാമിന് 130 രൂപ കുറഞ്ഞ് 13910 രൂപയായി. പവന് 111280 രൂപയുമായി. 18 കാരറ്റ് ഗ്രാമിന് 11430 രൂപ, 14 കാരറ്റ് ഗ്രാമിന് 8900 രൂപ, 9 കാരറ്റ് ഗ്രാമിന് 5740 രൂപ എന്നിങ്ങനെയാണ് ഇന്നത്തെ വില. വെള്ളിയുടെ വിലയും ഇടിഞ്ഞു. ഗ്രാമിന് 280 രൂപയായി കുറഞ്ഞു.

ജനുവരി 27നാണ് സ്വര്‍ണം പവന് 1.31 ലക്ഷമായി ഉയര്‍ന്നത്. ഫെബ്രുവരിയില്‍ രേഖപ്പെടുത്തിയ ഏറ്റവും ഉയര്‍ന്ന പവന്‍ വില 117760 രൂപയാണ്. കുറഞ്ഞ വില 107920 രൂപയും. ഈ വില രേഖപ്പെടുത്തിയ ശേഷമാണ് വീണ്ടും കുതിപ്പ് തുടങ്ങിയത്. ഇന്ത്യന്‍ രൂപയുടെ മൂല്യം മെച്ചപ്പെട്ടത് ഇന്ന് സ്വര്‍ണവില കുറയാന്‍ ഒരു കാരണമാണ്. ഡോളറിനെതരെ 90.30 എന്ന നിരക്കിലാണ് രൂപയുള്ളത്.