കോഴിക്കോട്: താമരശ്ശേരി ചുരം വ്യൂ പോയന്റിന് സമീപം റോഡിലേക്ക് കല്ലും മരങ്ങളും ഇടിഞ്ഞു വീണ് ഗതാഗത തടസ്സപ്പെട്ടു.വൈകീട്ട് 6:45 ഓടെയാണ് മണ്ണിടിച്ചിലുണ്ടായത്. ചുരം ഒൻപതാം വളവ് വ്യൂ പോയിന്റിന്റെ അടുത്തായി മണ്ണും മരങ്ങളും കല്ലുകളും റോഡിലേക്ക് പതിച്ചത് കാരണം ദേശീയ പാത 766 കോഴിക്കോട് വയനാട് പാതയിലെ താമരശ്ശേരി ചുരം വഴിയുള്ള വാഹന ഗതാഗതം പൂർണമായും നിലച്ചിരിക്കുകയാണ്.
ഇതുവഴി കാല്നട യാത്രക്കാർക്ക് വരെ നിലവില് കടന്ന് പോകുവാൻ സാധിക്കുകയില്ല. ഇപ്പോഴും പാറക്കല്ലുകള് റോഡിലേക്ക് വീഴുന്നുണ്ട് എന്നാണ്ലഭിക്കുന്ന വിവരം. അതുകൊണ്ട് ആരും തന്നെ കാഴ്ചകള് കാണാനും, മറ്റു അത്യാവശ്യമല്ലാത്ത യാത്രകള്ക്കുമായി ചുരത്തിലേക്ക് പ്രവേശിക്കരുത് എന്ന് ഓർമ്മിപ്പിക്കുന്നു.
താമരശ്ശേരി ചുരം കയറേണ്ട വാഹനങ്ങള് താമരശ്ശേരി ചുങ്കത്തുനിന്നും തിരിഞ്ഞ് കുറ്റ്യാടി ചുരം വഴി പോകണമെന്ന് പോലീസ് അറിയിച്ചു. കല്പറ്റയില് നിന്നും ഫയര് ഫോഴ്സ് എത്തി മരങ്ങളും, കല്ലും നീക്കം ചെയ്യാനുള്ള നടപടി തുടങ്ങിയിട്ടുണ്ട്.
Post a Comment