ഡല്‍ഹി: പൊതുസേവന, സാന്പത്തിക മേഖലയില്‍ ചില പരിഷ്കാരങ്ങള്‍ ഇന്നുമുതല്‍ പ്രാബല്യത്തില്‍ വരും. സാധാരണക്കാരെയും ബിസിനസുകാരെയും ഉള്‍പ്പെടെ സ്വാധീനിക്കുന്ന ഈ മാറ്റങ്ങള്‍ ഏതൊക്കെയെന്ന് നോക്കാം.പാൻ അപേക്ഷകള്‍ക്ക് ആധാർ നിർബന്ധം
പുതിയ പെർമനന്‍റ് അക്കൗണ്ട് നന്പർ (പാൻ കാർഡ്) അപേക്ഷിക്കുന്നതിന് ഇന്നുമുതല്‍ ആധാർകാർഡ് നിർബന്ധമാകും. സുതാര്യത പ്രോത്സാഹിപ്പിക്കുന്നതിനും ഡിജിറ്റല്‍ ഐഡന്‍റിറ്റി വെരിഫിക്കേഷൻ നടപടി ശക്തിപ്പെടുത്തുന്നതിന്‍റെയും ഭാഗമായിട്ടാണ് പുതിയ മാറ്റമെന്നാണ് സെൻട്രല്‍ ബോർഡ് ഓഫ് ഡയറക്‌ട് ടാക്സസിന്‍റെ (സിബിഡിടി) വിശദീകരണം.
തത്കാല്‍ ബുക്ക് ചെയ്യുന്നതിന് ആധാർ / പാൻ കാർഡ്
ഇന്ത്യൻ റെയില്‍വേയുടെ മൊബൈല്‍ ആപ്ലിക്കേഷനോ വെബ്സൈറ്റോ ആയി ആധാർ നന്പറോ അല്ലെങ്കില്‍ പാൻ കാർഡ് നന്പറോ ബന്ധിപ്പിച്ചാല്‍ മാത്രമേ ഇനിമുതല്‍ ഓണ്‍ലൈനായി തത്കാല്‍ ടിക്കറ്റുകള്‍ ബുക്ക് ചെയ്യാൻ സാധിക്കൂ.
ആധാർ അല്ലെങ്കില്‍ പാൻകാർഡ് നന്പറുമായി ലിങ്ക് ചെയ്യാത്തവർ റിസർവേഷൻ കൗണ്ടറുകളില്‍ നേരിട്ടെത്തി തത്കാല്‍ ടിക്കറ്റുകള്‍ ബുക്ക് ചെയ്യണം. ഇതോടൊപ്പം ജൂലൈ 15 മുതല്‍ ഓണ്‍ലൈനായും അല്ലാതെയുമുള്ള തത്കാല്‍ ടിക്കറ്റ് ബുക്കിംഗുകള്‍ക്ക് ഒടിപി അടിസ്ഥാനത്തിലുള്ള ആധാർ നന്പർ സ്ഥിരീകരണ സംവിധാനവും ഏർപ്പെടുത്തും. റിസർവേഷൻ കൗണ്ടറുകളിലും ഇതു ബാധകമാണ്. റെയില്‍വേ നിരക്കിലും നേരിയ മാറ്റം ഉണ്ടാകും.
ക്രെഡിറ്റ് കാർഡുകള്‍
സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ), ആക്സിസ് ബാങ്ക്, എച്ച്‌ഡിഎഫ്സി ബാങ്ക് തുടങ്ങിയവർ തങ്ങളുടെ ക്രെഡിറ്റ് കാർഡ് ഉപഭോക്താക്കള്‍ക്കുള്ള നയങ്ങളില്‍ ചില മാറ്റങ്ങള്‍ വരുത്തിയിട്ടുണ്ട്. ഇന്നുമുതല്‍ ഇവ പ്രാബല്യത്തില്‍ വരും. ജിഎസ്ടി, ഇഎംഐ, ക്രെഡിറ്റ് കാർഡ് ചാർജ് തുടങ്ങിയ കാര്യങ്ങളിലായിരിക്കും മാറ്റങ്ങള്‍ വരുത്തുക.
Post a Comment