തിരുവനന്തപുരം: നെന്മാറ ഇരട്ടക്കൊലപാതക കേസിലെ പ്രതി ചെന്താമര പദ്ധതി കൃത്യമായി നടപ്പാക്കിയതിന്റെ സന്തോഷത്തിലാണെന്ന് പൊലിസ് റിമാന്ഡ് റിപ്പോര്ട്ട്. കൊല നടത്തിയത് കൃത്യമായ ആസൂത്രണത്തോടെയാണെന്നും റിമാന്ഡ് റിപ്പോര്ട്ടില് പറയുന്നു. മുന്വൈരാഗ്യം വെച്ച് ആസൂത്രണത്തോടെ നടത്തിയ കൊലയാണെന്നും റിപ്പോര്ട്ടിലുണ്ട്.
ചെന്താമര പുറത്തിറങ്ങിയാല് ഒരു പ്രദേശത്തിന് മുഴുവന് ഭീഷണിയാണെന്നും റിമാന്ഡ് റിപ്പോര്ട്ടിലുണ്ട്. വൈകിട്ടോടെയാണ് ചെന്താമരയെ ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കി. തുടര്ന്ന് കോടതി പ്രതിയെ 14 ദിവസത്തേക്ക് റിമാന്ഡ് ചെയ്തു.
താന് എല്ലാം ചെയ്തത് ഒറ്റക്കാണെന്ന് ചെന്താമര പറഞ്ഞു. നൂറുവര്ഷം തന്നെ ശിക്ഷിക്കൂവെന്നും മകളുടെയും മരുമകന്റെയും മുന്നില് തല കാണിക്കാന് പറ്റില്ലെന്നും ചെന്താമര കോടതിയില് പറഞ്ഞു. പരുക്കുകള് ഉണ്ടോയെന്ന് ജഡ്ജി ചോദിച്ചപ്പോഴാണ് ചെന്താമരയുടെ പരാമര്ശം.
27നാണ് നെന്മാറയില് ജാമ്യത്തിലിറങ്ങിയ കൊലക്കേസ് പ്രതിയായ ചെന്താമര അയല്വാസികളായ അമ്മയെയും മകനെയും വെട്ടിക്കൊലപ്പെടുത്തിയത്. സുധാകരന്, അമ്മ മീനാക്ഷി എന്നിവരാണ് കൊല്ലപ്പെട്ടത്. സുധാകരന്റെ ഭാര്യ സജിതയെ 2019 ല് വെട്ടിക്കൊലപ്പെടുത്തിയ കേസില് ജയിലിലായിരുന്ന ചെന്താമര രണ്ട് മാസം മുന്പാണ് ജാമ്യത്തിലിറങ്ങിയത്.
Post a Comment