ദില്ലി : മണിപ്പൂരില് സ്ത്രീകളെ നഗ്നരാക്കി നടത്തി കൂട്ട ബലാല്സംഗം ചെയ്ത കേസില് രണ്ടു പേരെ കൂടി അറസ്റ്റ് ചെയ്തു.
ഇതോടെ കേസില് ഇതുവരെ നാല് പേരെയാണ് പൊലീസ് അറസ്റ്റ് ചെയ്തത്. സംഭവത്തില് ദേശീയ മനുഷ്യാവകാശ കമ്മീഷൻ മണിപ്പൂര് സര്ക്കാരിന് നോട്ടീസയച്ചു.
സംഭവത്തിന്റെ വീഡിയോ പ്രചരിച്ചത് വ്യാപക രോഷം ഉയര്ത്തിയതിന് പിന്നാലെയാണ് നടപടി. പൊലീസ് തങ്ങളെ ആള്ക്കൂട്ടത്തിന് വിട്ടുകൊടുക്കുകയായിരുന്നുവെന്ന് ആക്രമണത്തിന് ഇരയായ പെണ്കുട്ടി ഒരു മാധ്യമത്തോട് വെളിപ്പെടുത്തി. മെയ് നാലിന് മണിപ്പൂരിലെ തൗബാലില് ഉണ്ടായ കലാപത്തിന്റെ ദൃശ്യങ്ങളാണ് സാമൂഹിക മാധ്യമങ്ങളില് പ്രചരിച്ചത്.
രണ്ട് സ്ത്രീകളെ ആള്ക്കൂട്ടം നഗ്നരാക്കി നടത്തിക്കുകയും ലൈംഗീകമായി പീഡിപ്പിക്കുകയും ചെയ്യുന്ന ദൃശ്യങ്ങള് വന് രോഷത്തിന് വഴിവെച്ചു. എഫ്ഐആര് ഇട്ട് രണ്ട് മാസത്തിന് ശേഷമാണ് ആദ്യ അറസ്റ്റ് നടക്കുന്ന്. സ്ത്രീകളെ ലൈംഗീകമായി ഉപദ്രവിച്ച ആള്ക്കൂട്ടം ഇതില് ഒരാളെ കൂട്ടബലാത്സംഗത്തിന് ഇരയാക്കിയെന്നാണ് പരാതി.
കലാപക്കാര്ക്കൊപ്പമായിരുന്നു പൊലീസ് എന്ന് സ്ത്രീകളില് ഒരാള് ആരോപിച്ചു. മണിപ്പൂരില്
കൂട്ടബലാത്സംഗത്തിന് ഇരയായ സ്ത്രീയുടെ പിതാവിനെയും സഹോദരനെയും അക്രിമികള് കൊലപ്പെടുത്തിയെന്നും വിവരമുണ്ട്. മെയ്തത്തി വിഭാഗത്തില്പ്പെട്ട പെണ്കുട്ടിയെ ബലാത്സംഗം ചെയ്തുവെന്ന തരത്തില് പ്രചരിച്ച വ്യാജവീഡിയോ ആണ് ഈ ക്രൂരതക്ക് കാരണമായ അക്രമത്തിന് തുടക്കമിട്ടതെന്നും സൂചനയുണ്ട്. സംഭവം വൻ വിവാദമായതോടെ കേന്ദ്ര ആഭ്യന്തരമന്ത്രി അമിത് ഷാ മണിപ്പൂര് മുഖ്യമന്ത്രിയുമായി ഫോണില് സംസാരിച്ച് സാഹചര്യം വിലയിരുത്തി.
സ്ത്രീകളെ നഗ്നരാക്കി നടത്തിയത് അപമാനകരവും മനുഷ്യത്വരഹിതവുമെന്ന് ബീരേൻ സിങ് ട്വീറ്റ് ചെയ്തു. സംഭവത്തില് ആദ്യ അറസ്റ്റ് ഇന്ന് രാവിലെ നടന്നുവെന്നും സമഗ്ര അന്വേഷണം നടക്കുമെന്നും ബീരേന് സിങ് പറഞ്ഞു . തൗബാലിലെ ക്രൂരകൃത്യത്തിനെതിരെ ചുരാചന്ദ്പ്പൂരിലും ദില്ലിയിലും പ്രതിഷേധം നടന്നു.
ഇതിനിടെ ദൃശ്യങ്ങള് സാമൂഹിക മാധ്യമങ്ങളില് നിന്ന് നീക്കണമെന്ന് കേന്ദ്രസര്ക്കാര് ട്വിറ്റര് അടക്കമുള്ള കന്പനികളോട് നിര്ദേശിച്ചിട്ടുണ്ട്.
Post a Comment