സംസ്ഥാനത്ത് അന്തിമ വോട്ടര്‍ പട്ടികയായി; ഒഴിവാക്കിയത് അഞ്ചര ലക്ഷത്തിലേറെ പേരെ

സംസ്ഥാനത്തെ പ്രത്യേക സംക്ഷിപ്ത വോട്ടര്‍ പട്ടിക പുതുക്കല്‍ 2023 ന്റെ ഭാഗമായി സംസ്ഥാനത്ത് അന്തിമ വോട്ടര്‍ പട്ടിക പ്രസിദ്ധീകരിച്ചു.

ആകെ 2,67,95,581 വോട്ടര്‍മാരാണ് പട്ടികയില്‍ ഇടം പിടിച്ചിരിക്കുന്നത്. 2023 ജനുവരി ഒന്ന് യോഗ്യതാ തീയതിയായുള്ള അന്തിമ വോട്ടര്‍ പട്ടികയാണ് പ്രസിദ്ധീകരിച്ചത്. പ്രത്യേക സംക്ഷിപ്ത വോട്ടര്‍ പട്ടിക പുതുക്കല്‍ കാലയളവില്‍ ബൂത്ത് ലെവല്‍ ഓഫീസര്‍മാര്‍ നിരന്തരം വീടുകള്‍ സന്ദര്‍ശിച്ചാണ് മരണപ്പെട്ടവരുടേത് ഉള്‍പ്പെടെ ഏറ്റവും പുതിയ വിവരങ്ങള്‍ ശേഖരിച്ചത്.(assembly elections the final voters list published)

09.11.2022 ല്‍ പ്രസിദ്ധീകരിച്ച കരട് വോട്ടര്‍ പട്ടികയില്‍ ആകെ വോട്ടര്‍‌മാരുടെ എണ്ണം 2,71,62,290 ആയിരുന്നു.

കരട് വോട്ടര്‍ പട്ടിക പ്രസിദ്ധീകരിച്ച 09.11.2022 മുതല്‍ 18.12.2022 വരെയുള്ള സംക്ഷിപ്ത വോട്ടര്‍ പട്ടിക പുതുക്കല്‍ കാലയളവില്‍ നടന്ന വോട്ടര്‍ പട്ടിക ശുദ്ധീകരണ പ്രക്രിയയുടെ പശ്ചാത്തലത്തില്‍ മരണപ്പെട്ടതും (3,60,161) , താമസം മാറിയതും (1,97,497) ഉള്‍പ്പെടെ 5,65,334 വോട്ടര്‍മാരാണ് പട്ടികയില്‍ നിന്ന് ഒഴിവാക്കപ്പെട്ടത്.

സംസ്ഥാന മുഖ്യ തിരഞ്ഞെടുപ്പ് ഓഫീസര്‍ സഞ്ജയ് കൗളിന്റെ നിര്‍ദേശ പ്രകാരം ജില്ലകള്‍ തോറും വോട്ടര്‍ പട്ടിക പുതുക്കലിനായി തീവ്ര യജ്ഞമാണ് നടന്നത്. അഞ്ച് ലക്ഷത്തിലധികം വോട്ടര്‍മാര്‍ പട്ടികയില്‍ നിന്ന് നീക്കപ്പെട്ടത് വോട്ടര്‍ പട്ടിക ശുദ്ധീകരിച്ചു എന്നതിനു തെളിവാണെന്നും അദ്ദേഹം കൂട്ടിച്ചര്‍ത്തു. സംസ്ഥാന മുഖ്യ തിരഞ്ഞെടുപ്പ് ഓഫീസറുടെ വെബ്സൈറ്റില്‍ (www.ceo.kerala.gov.in) അന്തിമ വോട്ടര്‍ പട്ടിക വിവരങ്ങള്‍ ലഭ്യമാണ്.

അന്തിമ വോട്ടര്‍ പട്ടികയിലെ ചില സുപ്രധാന വിവരങ്ങള്‍ ചുവടെ ചേര്‍ക്കുന്നു.

ആകെ വോട്ടര്‍മാര്‍

2,67,95,581

ആകെ സ്ത്രീ വോട്ടര്‍മാര്‍

1,38,26,149

ആകെ പുരുഷ വോട്ടര്‍മാര്‍

1,29,69,158

ആകെ ഭിന്നലിംഗ വോട്ടര്‍മാര്‍

274

കൂടുതല്‍ വോട്ടര്‍മാരുള്ള ജില്ല

മലപ്പുറം (32,18,444 )

കുറവ് വോട്ടര്‍മാരുള്ള ജില്ല

വയനാട് (6,15,984 )

കൂടുതല്‍ സ്ത്രീ വോട്ടര്‍മാരുള്ള ജില്ല

മലപ്പുറം(16,08,247 )

കൂടുതല്‍ ഭിന്നലിംഗ വോട്ടര്‍മാരുള്ള ജില്ല

തിരുവനന്തപുരം (55 )

ആകെ പ്രവാസി വോട്ടര്‍മാര്‍

87,946

പ്രവാസി വോട്ടര്‍മാര്‍ കൂടുതലുള്ള ജില്ല

കോഴിക്കോട് (34,695)

പതിനെട്ട് വയസുള്ള 41,650 വോട്ടര്‍മാരാണ് പുതിയതായി വോട്ടര്‍ പട്ടികയില്‍ ഉള്‍പ്പെട്ടത്

17 വയസ് പൂര്‍ത്തിയായ 14,682 പേരാണ് മുന്‍കൂറായി വോട്ടര്‍ പട്ടികയില്‍ പേ‍ര് ചേര്‍ക്കാനായി അപേക്ഷിച്ചിരിക്കുന്നത്. ഏപ്രില്‍ 1, ജൂലൈ 1, ഒക്ടോബര്‍ 1, എന്നീ യോഗ്യതാ തീയതികളില്‍ എന്നാണോ 18 വയസ് പൂര്‍ത്തിയാകുന്നത്, ആ യോഗ്യതാ തീയതി അനുസരിച്ച്‌ അപേക്ഷ പരിശോധിക്കുകയും അര്‍ഹത അനുസരിച്ച്‌ വോട്ടര്‍ പട്ടികയില്‍ ഇടം പിടിക്കുകയും ചെയ്യും. ഇതിനു ശേഷം തിരിച്ചറിയല്‍ കാര്‍ഡ് ലഭിക്കും. സ്കൂള്‍ കോളേജ് തലത്തില്‍ പ്രവര്‍ത്തിക്കുന്ന ഇലക്‌ട്രല്‍ ലിറ്ററസി ക്ലബ്ബുകളുടെ ഫലപ്രദമായ പ്രവര്‍ത്തനത്തിന്റെ പശ്ചാത്തലത്തില്‍ കൂടിയാണ് പുതിയ അപേക്ഷകരുടെ വര്‍ധന.

വിവിധ പ്രായപരിധിയില്‍ ഉള്‍പ്പെടുന്ന 1,78,068 ആളുകളാണ് പുതിയതായി വോട്ടര്‍ പട്ടികയില്‍ പേര് ചേര്‍ത്തിട്ടുള്ളത്.

80 വയസിന് മുകളില്‍ പ്രായമുള്ള ആകെ വോട്ടര്‍മാര്‍ - 6,51,678 (സ്ത്രീ- 4,00,391 പുരുഷന്‍- 2,51,284 TG-3 )