ന്യൂഡല്ഹി: രാജ്പഥിന് ഇന്ന് മുതല് പുതിയ പേര്. ഇന്ന് മുതല് രാജ്പഥ് കാര്ത്തവ്യപഥ് എന്നറിയപ്പെടും.
ഇന്ത്യാ ഗേറ്റിന് സമീപം സ്ഥാപിച്ച നേതാജി സുഭാഷ് ചന്ദ്രബോസിന്റെ പ്രതിമയും പ്രധാനമന്ത്രി നരേന്ദ്ര മോദി അനാച്ഛാദനം ചെയ്തു. സെന്ട്രല് വിസ്ത പദ്ധതിയുടെ ഭാഗമായി കര്ത്തവ്യ പഥ് ഉള്പ്പെടുന്ന സെന്ട്രല് വിസ്ത അവന്യൂ 608 കോടി രൂപ ചെലവഴിച്ചാണ് നവീകരിച്ചത്. നടപ്പാതകളും ശൗചാലയങ്ങളും ഉള്പ്പെടെയുള്ള അധിക സൗകര്യങ്ങളും പൊതുജനങ്ങള്ക്കായി ഒരുക്കിയിട്ടുണ്ട്.
നേരത്തെ രാജ്പഥ് എന്നറിയപ്പെട്ടിരുന്ന തെരുവിന്റെ പേര് ഞായറാഴ്ചയാണ് എന്.ഡി.എം.സി ഔദ്യോഗികമായി പ്രഖ്യാപിച്ചത്. കഴിഞ്ഞ ദിവസം ചേര്ന്ന പ്രത്യേക യോഗത്തിലാണ് പേര് മാറ്റുന്ന കാര്യത്തില് തീരുമാനമെടുത്തത്. കേന്ദ്രമന്ത്രി മീനാക്ഷി ലേഖിയുടെ അധ്യക്ഷതയിലാണ് യോഗം ചേര്ന്നത്. നേതാജി പ്രതിമയില് നിന്ന് രാഷ്ട്രപതി ഭവനിലേക്കുള്ള റോഡും സമീപത്തെ പുല്ത്തകിടിയും ഇനി മുതല് ‘കര്ത്തവ്യപഥ്’ എന്നാണ് അറിയപ്പെടുക.
608 കോടി രൂപ ചെലവില് ഇന്ത്യാ ഗേറ്റ്, വിജയ് ചൗക്ക് പ്രദേശങ്ങള് മോടിപിടിപ്പിക്കാനുള്ള പദ്ധതിക്ക് കഴിഞ്ഞ വര്ഷം ഫെബ്രുവരിയിലാണ് തുടക്കമായത്. ഇരുവശത്തമുള്ള കനാലുകളെ നടപ്പാതയുമായി ബന്ധിപ്പിച്ചുകൊണ്ട് പാലങ്ങളും വശങ്ങളില് മനോഹരമായ പുല്മൈതാനവും ഒരുക്കിയിട്ടുണ്ട്.
Post a Comment