തളിപ്പറമ്പ്: ഇരിക്കൂർ മണ്ഡലത്തിലെ വില്ലേജുകളിൽ ഭൂമി, പട്ടയം സംബന്ധിച്ച പരാതികൾ പരിഹരിക്കുന്നതിന് വിപുലമായ യോഗം ചേരും. തളിപ്പറമ്പ് താലൂക്ക് കോൺഫറൻസ് ഹാളിൽ ആർഡിഒ ഇ.പി. മേഴ്സിയുടെ നേതൃത്വത്തിൽ ഇരിക്കൂർ എംഎൽഎ സജീവ് ജോസഫ് വിളിച്ചു ചേർത്ത യോഗത്തിലാണ് തീരുമാനം.
മണ്ഡലത്തിൽ മലയോര മേഖലയിലെ ഉദയഗിരി, വെള്ളാട്, ന്യൂ നടുവിൽ, പയ്യാവൂർ വില്ലേജുകളിലെ കോളനികൾ എന്നിവിടങ്ങളിൽ ഭൂമി, പട്ടയ വിഷയവുമായി നിരവധി പരാതികൾ നിലനിൽക്കുന്നതായി യോഗം വിലയിരുത്തി. തുടർന്നാണ് ശ്രീകണ്ഠപുരത്ത് എംഎൽഎ, ആർഡിഒ, ഡെപ്യൂട്ടി കളക്ടർമാർ, തഹസിൽദാർ, പഞ്ചായത്ത് പ്രതിനിധികൾ, വില്ലേജ് ഓഫിസർമാർ എന്നിവരെ പങ്കെടുപ്പിച്ച് വിപുലമായ യോഗം ചേരാനും ആവശ്യമെങ്കിൽ തദ്ദേശ സ്ഥാപനങ്ങൾ കേന്ദ്രീകരിച്ചുള്ള യോഗം വിളിച്ചു ചേർക്കാനും തീരുമാനിച്ചത്.
എംഎൽഎയുടെ പ്രതിനിധി ആർ. ചന്ദ്രശേഖരൻ അധ്യക്ഷനായിരുന്നു. ഉദയഗിരി പഞ്ചായത്ത് പ്രസിഡന്റ് കെ.എസ്. ചന്ദ്രശേഖരൻ, തഹസിൽദാർ എം. റെജി, വില്ലേജ് ഓഫിസർമാർ തുടങ്ങിയവർ സംബന്ധിച്ചു
Post a Comment