ആലക്കോട്: വിശിഷ്ട സേവനത്തിനുളള കൈരളി യുകെ ബെസ്റ്റ് നഴ്സ് അവാർഡ് 2023 ചെമ്പേരി ചെറിയ അരീക്കമല സ്വദേശിയും നോർത്ത് അയർലന്റ് ബെൽഫാസ്റ്റിൽ സ്റ്റാഫ് നഴ്സുമായ ബിജി തോമസ് കൊട്ടാരത്തിലിന് ലഭിച്ചു.
ലണ്ടനിൽ ഹീത്രോയിൽ നടന്ന കൈരളി യുകെ വാർഷിക സമ്മേളനത്തിൽ രാജ്യസഭാ എംപി എ.എ. റഹിം അവാർഡ് സമ്മാനിച്ചു.
ബിജി തോമസ് രണ്ടു പതിറ്റാണ്ടിലേറെയായി ഇവിടെ സേവനം ചെയ്തു വരുന്നു. ചെമ്പേരിയിലെ കൊട്ടാരത്തിൽ ത്രേസ്യാമ്മയുടെയും പരേതനായ തോമസിന്റെയും മകളാണ്. ബെൽഫാസ്റ്റിൽ ഫിനാൻസ് മാനേജരായ ജോസ് അഗസ്റ്റിനാണ് ഭർത്താവ്. മക്കൾ: ജെഫിൻ ജോസ്, സെഫിൻ ജോസ്, ഡാനിയേൽ ജോസ്.
വിദ്യാർത്ഥിയായിരിക്കുമ്പോൾ മുതൽ ബിജി തോമസ് ജീവകാരുണ്യ രംഗത്ത് സജീവമായിരുന്നു. ഭർത്താവും മക്കളും ജീവകാരുണ്യ പ്രവർത്തനങ്ങളിൽ പങ്കാളികളാണ്. ബ്രിട്ടനിലെ ഏറ്റവും വലിയ ജീവകാരുണ്യ പ്രസ്ഥാനമായ ബ്രിട്ടീഷ് മലയാളി ചാരിറ്റി ഫൗണ്ടേഷൻ സെക്രട്ടറിയാണ് ബിജി.
ദുരിതമനുഭവിക്കുന്ന ഉത്തരേന്ത്യയിലെ കർഷകരെ ഫണ്ട് സമാഹരിച്ച് സഹായിക്കാൻ മുന്നോട്ടു വന്നിട്ടുളള ബിജി കൂട്ടിക്കൽ ഉരുൾപൊട്ടൽ ദുരന്തത്തിൽ കിടപ്പാടം ഉൾപ്പെടെ എല്ലാം നഷ്ടപ്പെട്ട പാവപ്പെട്ടവരെ സഹായിക്കാനുള്ള പ്രവർത്തനങ്ങളിലും സജീവമായിരുന്നു.
വിദ്യാർത്ഥി വിസയിൽ യുകെയിലെത്തിയ ശേഷം രോഗം ബാധിച്ച് അവശനിലയിലായ ശബരി എന്ന വിദ്യാർത്ഥിയെ സഹായിക്കുകയും ശുശ്രുഷിക്കുകയും ഒറ്റക്ക് യാത്ര ചെയ്യാൻ കഴിയാതിരുന്ന അദ്ദേഹത്തെ നാട്ടിലെത്തിച്ചതും ബിജി തോമസാണ്.
Post a Comment