ഇരിട്ടി: ആടുമേയ്ക്കുന്നതിനിടെ കിണറ്റില്‍ വീണയാളെ രക്ഷപ്പെടുത്തിയത് പിറ്റേന്ന്. ഇരിട്ടിക്ക് അടുത്ത ചാക്കോട് എന്ന സ്ഥലത്ത് വെളിക്കോത്ത് മുഹമ്മദ് (60 ) എന്നയാളാണ് വെള്ളിയാഴ്ച ആളൊഴിഞ്ഞ പറമ്ബിലെ കിണറ്റില്‍ വീണത്.
മേയുന്നതിനിടെ ആട് അബദ്ധത്തില്‍ ആള്‍മറയില്ലാത്ത കിണറ്റില്‍ വീഴാൻ പോകുന്നത് കണ്ട് ഇതിനെ രക്ഷിക്കുന്നതിനിടെ മുഹമ്മദ് 20 കോല്‍ താഴ്ചയുള്ള കിണറ്റില്‍ വീഴുകയായിരുന്നു.
മോട്ടോറിന്‍റെ പൈപ്പില്‍ പിടിച്ചു നിന്ന് മുഹമ്മദ് രാത്രി കഴിച്ചു കൂട്ടുകയായിരുന്നു. ആടിനെ മേയ്ക്കാൻ പോയാല്‍ പലപ്പോഴും മുഹമ്മദ് രാത്രി വളരെ വൈകിയൊക്കെയേ തിരിച്ചെത്താറുള്ളൂ എന്നതിനാല്‍ ആരും തിരക്കിയുമില്ല. ഇന്നലെ രാവിലെ റബർ ടാപ്പിംഗിനെത്തിയ തൊഴിലാളികള്‍ കിണറ്റില്‍ നിന്ന് ശബ്ദം കേട്ടതിനെ തുടർന്ന് നോക്കിയപ്പോഴാണ് മുഹമ്മദിനെ കണ്ടെത്തുന്നത്. വിവരമറിയിച്ചതിനെ തുടർന്ന് ഇരിട്ടിയില്‍ നിന്നുള്ള അഗ്നിരക്ഷാ സേനയെത്തി രക്ഷിക്കുകായിരുന്നു. വീഴ്ചയില്‍ മുഹമ്മദിന് പരിക്കൊന്നുമില്ല.
സ്റ്റേഷൻ ഓഫീസർ ഉണ്ണികൃഷ്ണൻ എഎസ്ടിഒ ബെന്നി ദേവസ്യ, ഫയർ ഓഫിസർമാരായ ശാലോ സത്യൻ, എച്ച്‌.കെ. ധനീഷ്, അനീഷ് പലവിള, ആഷിക്ക്, ഹോം ഗാർഡുമാരായ ധനേഷ്, രമേശൻ, ബിനോയി, രാധാകൃഷ്ണൻ, ഡ്രൈവർ മത്തായി എന്നിവരടങ്ങിയ സംഘമാണ് മുഹമ്മദിനെ രക്ഷിച്ചത്.
Post a Comment